Toshkentda Navro‘z bayrami keng ko‘lamda o‘tkaziladi
Toshkent shahar hokimligi 2026 yil Navro‘z bayrami munosabati bilan poytaxtning turli hududlarida keng ko‘lamli ommaviy tadbirlar o‘tkazilishini ma’lum qildi. Bu haqda Zamin.uz xabar berdi.
Bayram dasturi nafaqat shahar markazida, balki shaharning boshqa tumanlarida ham tashkil etiladi. Asosiy bayram maskanlari quyidagilar: 21-22 mart kunlari “O‘zbekiston ovozi” turizm ko‘chasi va Taras Shevchenko gastronomik ko‘chasi, 21-23 mart kunlari “Navro‘z” etno bog‘i, shuningdek 21 mart kuni Al-Xorazmiy turizm ko‘chasi faoliyat ko‘rsatadi.
Bundan tashqari, quyidagi hududlarda ham bayram tadbirlari bo‘lib o‘tadi: Yunusobod tumani, Yunusobod Galereya majmuasi oldi; Bektemir tumani, “Coca Cola” bog‘i; Mirzo Ulug‘bek tumani, “Central Park”; Sergeli tumani, markaziy xiyobon; Olmazor tumani, Talabalar shaharchasi ya’ni Beruniy metrosi yonida; Shayxontohur tumani, “Anhor Lokomotiv” va “Tashkent City” bog‘lari; Uchtepa tumani, “Seul” ekobogi; Chilonzor tumani, G‘ofur G‘ulom bog‘i; Yakkasaroy tumani, “Next” savdo majmuasi; Yashnobod tumani, “Ashxobod sayilgohi” bog‘i hamda Yangihayot tumani, “Mehrigiyo” maydoni. Bayram dasturida milliy taomlar va bahorlik ne’matlari keng ko‘lamda namoyish etiladi.
Sumalak, halim, somsa va an’anaviy palov tayyorlash jarayonlari bilan tanishish va ularni tatib ko‘rish imkoniyati yaratiladi. Shuningdek, mashhur san’atkorlar ishtirokidagi konsert dasturlari, hunarmandchilik va amaliy san’at ko‘rgazmalari tashkil etiladi.
Milliy o‘yinlar, xalq tomoshalari va qiziqarli bellashuvlar ham o‘tkaziladi. Navro‘z tadbirlari shahar aholisi va mehmonlar uchun bayramona kayfiyat yaratib, qadimiy an’ana va madaniyatimizni yaqqol ifodalaydi.
Bu bayram poytaxtimizda bahorning kelishini nishonlashning o‘ziga xos va mazmunli usullaridan biridir. Barcha fuqarolarni ushbu bayram tadbirlarida faol ishtirok etishga taklif qilamiz.
