Shavkat Mirziyoyev Qasim-Jomart Toqayevni tug'ilgan kuni bilan tabrikladi
O‘zbekiston Respublikasi Prezidenti Shavkat Mirziyoyev bugun Qozog‘iston Respublikasi Prezidenti Qasim-Jomart Toqayev bilan telefon orqali muloqot qildi. Bu haqda Zamin.uz xabar berdi.
Davlatimiz rahbari qardosh mamlakat yetakchisini tavallud ayyomi bilan samimiy qutlab, unga mustahkam sog‘liq, uzoq umr va davlat boshqaruvidagi mas’uliyatli faoliyatida ulkan zafarlar tiladi. Prezident matbuot xizmati bergan ma’lumotga ko‘ra, muloqot chog‘ida ikki mamlakat o‘rtasidagi ko‘p asrlik do‘stlik, yaxshi qo‘shnichilik va strategik sheriklik munosabatlarining bugungi holati hamda istiqbollari atroflicha muhokama qilindi.
Suhbat davomida tomonlar O‘zbekiston va Qozog‘iston o‘rtasidagi oliy darajadagi kelishuvlar ijrosiga alohida e’tibor qaratdilar. So‘nggi yillarda o‘zaro hamkorlik sifat jihatidan yangi bosqichga ko‘tarilgani, ayniqsa, ittifoqchilik munosabatlari mustahkamlanib borayotgani mamnuniyat bilan qayd etildi.
Davlat rahbarlari ikki tomonlama tovar ayirboshlash hajmini yaqin yillarda o‘n milliard dollarga yetkazish bo‘yicha belgilangan vazifalarni amalga oshirish muhimligini ta’kidladilar. Shu maqsadda iqtisodiyotning turli tarmoqlarida, xususan, energetika, transport-logistika, sanoat va qishloq xo‘jaligi sohalarida yirik investitsiya loyihalarini jadallashtirishga kelishib olindi.
Shuningdek, muloqotda hududlararo aloqalarni yanada kengaytirish va madaniy-gumanitar almashinuvlarni ko‘paytirish masalalari ko‘rib chiqildi. Hukumatlararo komissiya faoliyatini jonlantirish hamda yaqin orada rejalashtirilgan oliy darajadagi tadbirlarga tayyorgarlik ko‘rish masalalari ham diqqat markazida bo‘ldi.
Muloqot yakunida Shavkat Mirziyoyev va Qasim-Jomart Toqayev mintaqaviy xavfsizlik va xalqaro tashkilotlar doirasidagi hamkorlikni davom ettirish borasida yakdil ekanliklarini bildirdilar. Ikki davlat yetakchilarining suhbati har doimgidek ochiq, samimiy va do‘stona ruhda o‘tdi.
