Bugun bayram munosabati bilan ish vaqti bir soatga qisqartiriladi
O'zbekiston Respublikasining Mehnat kodeksiga muvofiq, bayram kunlari arafasida ish vaqtini qisqartirish barcha ish beruvchilar uchun majburiy tartib hisoblanadi. Bu haqda Zamin.uz xabar berdi.
Amaldagi qonunchilik talablariga ko'ra, rasmiy bayram sanalaridan oldingi ish kuni yoki smena muddati barcha toifadagi xodimlar uchun kamida bir soatga qisqartirilishi belgilab qo'yilgan. Bu qoida nafaqat davlat tashkilotlari, balki xususiy korxona va muassasalarda faoliyat yuritayotgan ishchilar uchun ham amal qiladi.
Ertaga mamlakatimizda muqaddas Qurbon hayiti bayramining birinchi kuni sifatida nishonlanadi. Shu munosabat bilan bugun barcha mehnat jamoalari uchun bayramoldi ish kuni hisoblanadi.
Demak, bugun xizmat vazifasini bajarayotgan har bir xodim belgilangan ish vaqtidan bir soat vaqtliroq uyiga ketishga to'laqonli qonuniy huquqqa ega. Ushbu tartib xodimlarning bayramga munosib tayyorgarlik ko'rishlari va oila davrasida ko'proq vaqt o'tkazishlarini ta'minlash maqsadida joriy etilgan.
Shuni alohida ta'kidlash joizki, ish vaqtining bir soatga qisqartirilishi xodimlarning ish haqiga salbiy ta'sir ko'rsatmaydi. Ya'ni, ish vaqti kamaygan bo'lsa-da, mehnat haqi to'liq miqdorda to'lanadi.
Ish beruvchilar ushbu qonun talablariga qat'iy rioya etishlari shart. Agar korxona yoki tashkilotda ish jarayoni to'xtovsiz xarakterga ega bo'lsa va ish vaqtini qisqartirishning imkoni bo'lmasa, u holda xodimga ushbu vaqt uchun qo'shimcha haq to'lanishi yoki boshqa vaqtda dam olish kuni berilishi lozim.
Bugungi ish kuni davomida barcha yurtdoshlarimizga samarali faoliyat va bayramona kayfiyat tilaymiz.
