Og‘ir kasallikdagi mahkumlar uchun yangi tartib joriy etildi

O‘zbekistonda jazo o‘tayotgan, ammo sog‘ligi yomonlashgan mahkumlar uchun qonunchilikka muhim o‘zgartirishlar kiritilmoqda. Bu haqida Zamin.uz xabar berdi.

Endilikda og‘ir kasallikka chalingan mahkumlar statsionar sharoitda to‘liq tibbiy tekshiruvdan o‘tkaziladi va ularni jazodan ozod qilish tartibi yanada aniqroq belgilanadi. Bu haqda norma.uz xabar berdi.

Jazoni ijro etish muassasalarida davolanayotgan va og‘ir tashxis qo‘yilgan bemorlar uchun shifokorlar xulosasi yetarli emas. Ushbu tashxis Ichki ishlar vazirligi Tibbiyot boshqarmasining bosh inspektor-shifokori tomonidan ham tasdiqlanishi shart qilinmoqda.

Bu chora shoshma-shosharlik va noto‘g‘ri qarorlar qabul qilinishining oldini olishga qaratilgan. Ruhiy holati buzilgan mahkumlar esa maxsus shifoxonalarda yoki psixiatriya bo‘limlarida to‘liq statsionar nazoratga olinadi.

Ular nafaqat jismoniy, balki psixologik jihatdan ham sinchiklab tekshiriladi. Har bir holatda tashxis va baholash mutaxassislar ishtirokida amalga oshiriladi.

Bemor mahkumni jazodan ozod qilish haqidagi qaror sud majlisida qabul qilinadi. Bu jarayonda mahkum, prokuror, zarur hollarda uning himoyachisi va qonuniy vakili, taqdimnoma bergan muassasa rahbari, kasalxona va tibbiyot bo‘limi vakillari hamda uni davolovchi shifokor (ruhiy holat muhokama qilinsa psixiatr) ishtirok etadi.

Agar sud jazodan ozod qilishga qaror qilsa, qarordan norozi tomonlar — prokuror, mahkum, uning vakili yoki himoyachisi yuqori instansiyaga shikoyat yoki protest kiritish huquqiga ega bo‘ladi. Ushbu yangilanishlar insonparvarlik tamoyillariga asoslangan jazo siyosatini qayta ko‘rib chiqishga qaratilganini ko‘rsatadi.

Shuningdek, og‘ir ahvolda bo‘lgan shaxslarga munosib tibbiy yordam ko‘rsatish, adolatni ta’minlash va inson qadrini hurmat qilish davlatning ustuvor vazifalaridan biri bo‘lib qolmoqda.