Pervis Estupinyan «Milan» bilan shartnoma imzolaydi

Brighton jamoasining himoyachisi Pervis Estupinyan Milan klubi bilan shartnoma imzolash bo‘yicha kelishuvga erishdi. Bu haqida Euro-football.ru xabar berdi.

Bu haqda jurnalist Ben Jeykob o‘zining ijtimoiy tarmoqlardagi sahifalarida ma’lum qildi. Oldinroq, xuddi shu manba Ekvador terma jamoasi a’zosi bo‘lgan futbolchiga Manchester Yunayted jiddiy qiziqish bildirayotgani haqida xabar bergan edi.

Brighton esa Estupinyan o‘rniga allaqachon yangi himoyachi topib, Bryugge klubidan Maksim de Kuyperni sotib oldi. Milan afsonasi Kafu ushbu futbolchi jamoaga juda mos kelishini ta’kidlab o‘tdi.

Unga ko‘ra, Estupinyan tezkor, jasoratli va o‘yinni boshqarishni o‘z zimmasiga olishga tayyor futbolchi hisoblanadi. Seriya A musobaqasi talabchan bo‘lsa-da, bunday jismoniy imkoniyatlarga ega o‘yinchi muvaffaqiyat qozonishi shubhasiz.

Boshqa manbalardan olingan ma’lumotlarga ko‘ra, futbolchi bilan to‘rt yillik shartnoma imzolanishi rejalashtirilgan bo‘lib, uning yillik maoshi ikki million yevroga teng bo‘ladi. O‘tgan mavsumda 27 yoshli himoyachi barcha turnirlarda jami 36 ta o‘yinda maydonga tushib, 7 ta sariq kartochka olgan, 1 ta gol urgan va 1 ta samarali uzatma amalga oshirgan.

Hozirgi kunda Estupinyanning bozor qiymati 30 million yevro atrofida baholanmoqda.