«Barselona» yozgi transfer oynasi yopilishidan oldin bir qancha futbolchilar bilan xayrlashishni rejalashtirmoqda. Bu haqida Euro-football.ru xabar berdi.
Klub prezidenti Joan Laporta yaqinda qo‘shimcha xaridlar qilinmasligini ma’lum qildi, biroq jamoa tarkibidan kimdir ketishi aniq. «Gazeta.ru» nashrining Diario Sportga tayanib xabar berishicha, yoz oxirigacha «Barselona» kamida ikki futbolchini sotish bo‘yicha ish olib boradi.
Sport direktori Deku allaqachon ketayotgan futbolchilar bilan bog‘liq operatsiyalar ustida ishlamoqda. Joriy transfer oynasida «ko‘k-qizil» jamoa hujumchi Pau Viktorini «Braga» klubiga, chap qanot himoyachisi Aleks Valye va yarim himoyachi Pablo Torreyni mos ravishda «Komo» va «Malyorka» jamoalariga sotdi.
Shuningdek, qanot hujumchisi Ansu Fati «Monako» klubiga ijaraga berildi. Ushbu o‘zgarishlar jamoaning yozgi transfer siyosatining bir qismi sifatida ko‘rilmoqda va «Barselona» tarkibini optimallashtirishga qaratilgan.
Klub rahbariyati futbolchilar bilan kelishuvlarni yakunlash uchun ishlarni davom ettirmoqda.
