Manchester Yunayted klubi “RB Leyptsig” jamoasining hujumchisi Benyamin Sheshkoni sotib olish uchun katta mablag‘ ajratishiga to‘g‘ri keladi. Bu haqida Euro-football.ru xabar berdi.
Ingliz ommaviy axborot vositalari xabariga ko‘ra, aynan sloveniya futbolchisi “qizil iblislar” uchun hujumchi pozitsiyasida asosiy transfer maqsadi sifatida belgilangan. Jurnalist Devid Ornshteynning ma’lumot berishicha, “RB Leyptsig” o‘z talablarini potentsial xaridorlarga yetkazgan.
Germaniya klubi Benyamin Sheshko uchun 75 million yevro miqdorida kafolatlangan to‘lov va qo‘shimcha bonuslarni talab qilmoqda. Bundan tashqari, klub futbolchi keyinchalik boshqa jamoaga sotilsa, transferdan ma’lum foiz ulush olishga ham umid qilmoqda.
Benyamin Sheshkoga Angliya Premer-ligasining yana bir vakili – Nyukasl ham qiziqish bildirmoqda. Hozirgi vaqtda na futbolchi, na uning klubi bilan hech bir jamoa aniq kelishuvga erisha olmagan.
22 yoshli hujumchining kelajagi hozircha noma’lumligicha qolmoqda. Bu transfer bo‘yicha muzokaralar davom etmoqda va yaqin kunlarda yangi ma’lumotlar paydo bo‘lishi mumkin.
