Galatasaray klubi hujumchi Viktor Osimxenni Napoli jamoasidan to‘liq xarid qilgani haqida rasmiy ma’lumot berdi. Bu haqida Euro-football.ru xabar berdi.
Klub ushbu transfer uchun rekord summa — 75 million yevro to‘ladi. Bu Galatasaray tarixidagi eng qimmatbitim hisoblanadi.
Jurnalist Nikolo Skira xabariga ko‘ra, nigeriyalik futbolchi yiliga 18 million yevro maosh oladi. Shuningdek, Napoli kelajakda Osimxen boshqa klubga sotilganda transfer summasining 10 foizini oladi.
O‘tgan mavsumda Viktor Osimxen Galatasaray tarkibida ijarada o‘ynagan edi. Futbolchi 2020 yilda Fransiyaning Lill klubidan Napoli jamoasiga o‘tgan.
O‘tgan mavsum yakunlariga ko‘ra, Galatasaray Turkiya chempioni bo‘ldi va mamlakat Kubogini ham qo‘lga kiritdi. Osimxen jamoa safida 41 o‘yinda maydonga tushib, 37 ta gol urishga muvaffaq bo‘ldi.
Bu natijalar klub uchun muhim ahamiyatga ega bo‘ldi va futbolchining transfer qiymatini oshirdi. Galatasaray ushbu transfer orqali jamoani kuchaytirishni va kelgusi mavsumlarda ham yuqori natijalarga erishishni maqsad qilgan.
Klub rahbariyati futbolchidan katta umid qilmoqda.
