Barselona futbol klubi sport direktori Deco va bosh murabbiy Xans-Diter Flik jamoa tarkibini optimallashtirishni rejalashtirmoqda. Bu haqida Euro-football.ru xabar berdi.
Ularning fikriga ko‘ra, ayniqsa yarim himoya chizig‘ida ortiqcha futbolchilar bor va bu holatni tartibga keltirish lozim. Shu sababli, klub akademiyasi tarbiyalanuvchisi Mark Kasado transferga chiqarilishi mumkin bo‘lgan futbolchilar ro‘yxatiga kiritilgan.
Mark Kasado o‘zi jamoani tark etishni istamaydi, biroq agar uning transferi uchun 30 million yevro miqdorida taklif tushsa, uni saqlab qolish qiyin bo‘lishi mumkin. Avvalroq, futbolchiga Angliyaning Chelsi, Arsenal va Manchester Yunayted klublari tomonidan qiziqish bildirayotgani haqida xabarlar chiqqan edi.
Shunga qaramay, hozirgacha Barselona klubiga ushbu futbolchini sotib olish bo‘yicha aniq va jiddiy taklif kelib tushgani yo‘q. Ma’lumot uchun, Mark Kasado o‘tgan mavsumda Barselona safida jami 36 ta o‘yinda maydonga tushib, 1 ta gol urdi va 6 ta golli uzatmani amalga oshirdi.
U hali yosh bo‘lishiga qaramay, klubda o‘z o‘rniga ega va uning kelajagi borasida yakuniy qaror hali qabul qilinmagan.
