"Barselona" futbol klubi yarim himoyachisi Fermin Lopes "Manchester Yunayted" jamoasining transfer maqsadiga aylandi. Bu haqida Euro-football.ru xabar berdi.
Angliyaning mashhur klubi 22 yoshli futbolchi uchun 70 million yevro taklif qilishga tayyor ekani haqida Sport nashri xabar bermoqda. Shuningdek, "Manchester Yunayted" Fermin Lopesga ikki baravar yuqori maosh va boshqa qulay shartlarni ham taklif qilmoqda.
Agar bu transfer amalga oshsa, "Barselona" klubi moliyaviy qoidalarga ko‘ra yangi futbolchilarni erkin ro‘yxatdan o‘tkazish imkoniyatiga ega bo‘ladi va yana bir futbolchini sotib olishi mumkin. Biroq boshqa manbalar xabariga ko‘ra, "Barselona" bosh murabbiyi Xans-Diter Flik Fermin Lopes klubda qolishini istamoqda va uni sotishga qarshi.
Fermin Lopesning o‘zi ham klubni tark etish niyatida emas. Transfermarkt portali ma’lumotiga ko‘ra, Fermin Lopesning bozor qiymati 50 million yevroni tashkil etadi.
Uning "Barselona" bilan amaldagi shartnomasi 2029 yilgacha mo‘ljallangan. Shu sababli, futbolchining yaqin orada boshqa klubga o‘tishi hozircha kutilmayapti.
"Barselona" rahbariyati ham Lopesga katta umid bog‘layotganini ta’kidlamoqda.
