Tottenxem Eze transferi bo‘yicha muzokaralarni boshladi

«Kristal Pelas» jamoasida hujumkor yarim himoyachi sifatida to‘p surayotgan Eberechi Eze «Tottenxem» klubining qiziqishiga sabab bo‘lmoqda. Bu haqida Euro-football.ru xabar berdi.

Angliyaning mashhur klublaridan biri bo‘lgan «Tottenxem» ushbu futbolchini o‘z safiga qo‘shib olishni ustuvor maqsadlardan biri deb belgilagan. Dastlabki muzokaralar allaqachon boshlangan.

Bu haqda jurnalist Pol O'Kif xabar berdi. Eze transferi «Manchester Siti» futbolchisi Savio bilan bog‘liq kelishuvdan mustaqil tarzda amalga oshirilishi mumkin.

Ya’ni, «Tottenxem» jamoasini boshqarayotgan Tomas Frank ikki futbolchini ham tarkibga qo‘shishni rejalashtirmoqda. Eberechi Ezening «Kristal Pelas» bilan tuzgan shartnomasi 2027 yilgacha amal qiladi.

Transfermarkt portali ma’lumotiga ko‘ra, futbolchining taxminiy narxi 55 million yevroga teng. Avvalroq ushbu futbolchiga boshqa bir London klubi – «Arsenal» ham asosiy da’vogar sifatida qaralgan edi.

Hozirda esa «Tottenxem» Ezeni o‘z tarkibiga qo‘shib olish uchun faol harakat qilmoqda.