Morata “Galatasaroy” rahbariyatini va’dabozlikda aybladi
Hujumchi Alvaro Morata “Galatasaroy” klubini tark etdi. Bu haqida Euro-football.ru xabar berdi.
Uning ijaraga o‘tish bo‘yicha kelishuvi muddatidan oldin bekor qilindi. Endi 32 yoshli hujumchining “Milan” klubidan “Komo” jamoasiga o‘tishiga hech qanday to‘sqinlik yo‘q.
“Galatasaroy”ni tark etgach, Morata o‘z munosabatini bildirdi. Morata o‘z bayonotida “Galatasaroy” muxlislariga minnatdorlik bildirdi.
U ularning iliq munosabati va qo‘llab-quvvatlagani uchun samimiy rahmat aytdi. Futbolchi muxlislarning e’tibori va yordami uning faoliyatidagi eng esda qolarli voqealardan biri bo‘lganini ta’kidladi.
Biroq, u klub rahbariyati bilan bo‘lgan munosabatlardan qoniqmaganini ham aytib o‘tdi. Uning so‘zlariga ko‘ra, ba’zi va’dalar bajarilmagan va asosiy qadriyatlar hurmat qilinmagan.
Morata ayrim mablag‘lardan voz kechishga majbur bo‘lganini, ba’zi raqamlar esa noto‘g‘ri yoritilganini qayd etdi. U hayot va ishda inson huquqlariga hurmat qilish muhimligini ta’kidladi.
Uning fikricha, mehnatga haq to‘lashda adolat va professionallik tamoyillariga amal qilinishi kerak. Morata klub tomonidan to‘liq haqini ololmagani uchun afsusda ekanini bildirdi.
