Bavariya Gerreyroni sotishni rejalashtirmayapti

«Bavariya» joriy mavsum davomida chap qanot himoyachisi Rafael Gerreyrudan ayrilishni rejalashtirmayapti. Bu haqda Euro-football.ru xabar berdi.

31 yoshli futbolchi ko‘pincha asosiy tarkibda maydonga tushmaydi, shuning uchun ommaviy axborot vositalarida uning klubni tark etishi mumkinligi haqida gap-so‘zlar paydo bo‘lgan edi. Ammo jurnalist Florian Plettenbergning xabariga ko‘ra, «Bavariya» yanvar oyida Gerreyruni sotishga niyat qilmaydi.

Klub futbolchining ko‘p qirrali o‘yin uslubini yuqori baholaydi va uni mavsum oxirigacha saqlab qolishni xohlaydi. Murabbiy Vensan Kompani portugaliyalik futbolchini juda qadrlaydi.

Rafael Gerreyru joriy mavsumda «Bavariya» safida yetti o‘yinda maydonga tushdi va bitta gol hamda bitta assist qayd etdi. Himoyachining shartnomasi kelasi yil iyun oyida yakunlanadi.

U nafaqat himoyada, balki yarim himoyada ham o‘ynashga qodir. Klub uni o‘z safida ushlab turishni afzal ko‘rmoqda.