"Manchester Siti"ning tajribali yetakchisi Kevin De Bryuyne klubda qolishi mumkin. 33 yoshli belgiyalik pleymeykerning yangi mavsumda ham "shaharliklar" safida to‘p surish ehtimoli yana kuchaydi. Bu haqda angliyalik jurnalistlar tarqatayotgan xabarlarda qayd etilmoqda.
Ma’lumotlarga ko‘ra, Kevin klub rahbariyatiga va bosh murabbiy Xosep Gvardiolaga aniq bildirgan: agar uning kelajagi haqidagi fikrlar qayta ko‘rib chiqilsa, u "Siti" bilan yangi shartnoma imzolashga tayyor. Bu holat futbolchining klubga sodiqligi va g‘alabalarga chanqoqligini yana bir bor ko‘rsatadi.
Eslatib o‘tamiz, De Bryuyneda hozirgi shartnoma kelayotgan yozda o‘z yakuniga yetadi. Shu sabab, klub futbolchining kelajagi borasida o‘ylashni boshlab yuborgan, hatto uning ketishi mumkinligi haqidagi ma’lumotlar ham tarqalgan edi. Bu xabarlar Kevinga katta ta’sir o‘tkazdi, va hatto u bir muddat klubdan ketishini ma’lum qilgandi.
Biroq futbolchida hali ham yuqori saviyada o‘ynashga ishonch bor. U, agar imkoniyat berilsa, jamoaning Angliya Premer-ligasidagi chempionlik unvonini qaytarib olishida hal qiluvchi shaxsga aylanishi mumkinligini ta’kidlagan.
De Bryuyne "Manchester Siti" safida 2015 yildan buyon to‘p surib kelmoqda. Bu davr mobaynida u jamoa bilan bir qator yirik sovrinlarni qo‘lga kiritdi va jamoaning asosiy kuchlaridan biriga aylandi. Uning maydondagi vijdonli va aniq o‘yini klub tarixida alohida o‘rin egallaydi.
Endi barcha e’tibor klub rahbariyatiga qaratilgan. Ularning qaroridan kelajakdagi muhim transfer jarayonlari ham, jamoa ichki muhiti ham bog‘liq. Agar De Bryuyne bilan shartnoma uzaytirilsa, bu "Siti" uchun yana bir tajribali yo‘lboshchining saqlanishi bo‘ladi.
Siz nima deb o‘ylaysiz: Kevin De Bryuyne yana necha yil "Siti" safida porlaydi?
👍 0❤️ 0😂 0😢 0😡 0
