Serxio Ramos "Sevilya" klubini sotib olishi mumkin

Ispaniyada sobiq "Real Madrid" futbolchisi Serxio Ramos o‘zining sobiq klubi "Sevilya"ni sotib olishni rejalashtirayotgani haqida yangi ma’lumotlar paydo bo‘ldi. Bu haqda Zamin.uz xabar berdi.

Bu haqda euro-football.ru xabar bermoqda. Avvalroq Ramosning "Sevilya"da rahbarlik lavozimini egallashi ehtimoli muhokama qilingan edi.

Endilikda esa uning klubni to‘liq sotib olishi masalasi ham ko‘rib chiqilmoqda. Cadena Ser Carrusel Deportivo manbasining ma’lumotiga ko‘ra, Ramos klubni sotib olish uchun 450 million yevro ajratishga tayyor.

Hozirda futbolchining yuristlari bu masalani batafsil o‘rganmoqda. Biroq jarayon bir necha oy davom etishi mumkinligi aytilmoqda.

Manbalarga ko‘ra, "Sevilya"ning hozirgi egalari jamoaning natijalari pasaygani va moliyaviy qiyinchiliklar sabab klubni sotishga qaror qilgan. Serxio Ramos tomoni esa "Sevilya"ning moliyaviy holatini va hisobotlarini sinchiklab tekshirmoqda.

Ayni paytda, La Liga turnir jadvalida "Sevilya" 21-turdan keyin 10-o‘rinda bormoqda.