Gvardiola ikki o'yinga diskvalifikatsiya qilindi
"Manchester Siti" jamoasining bosh murabbiyi Xosep Gvardiola Angliya kubogi doirasida "Nyukasl"ga qarshi o'yinda hakamlar bilan kelishmovchilikka tushib qolgani uchun ikki o'yinga diskvalifikatsiya qilindi. Bu haqda Zamin.uz xabar berdi.
"Sent-Jeyms Park" stadionida o'tgan uchrashuvda Gvardiola "Nyukasl" himoyachisi Kiran Trippyerning "Manchester Siti" hujumchisi Jeremi Dokuga nisbatan qo'pol harakatidan norozi bo'lib, zaxira hakami bilan bahslashdi. Bu holatdan so'ng bosh hakam Gvardiolaga sariq kartochka ko'rsatdi.
Bu joriy mavsumdagi oltinchi ogohlantirish bo'lib, qoidalarga ko'ra murabbiy ikki o'yinga chetlatiladi. Ushbu jazo Premier-liga va Angliya kubogi uchrashuvlariga tatbiq etiladi.
Shu sababli, Gvardiola "Vest Xem"ga qarshi chempionat o'yini va Angliya kubogi chorak finalida jamoasini to'g'ridan-to'g'ri maydon chetidan boshqara olmaydi. Biroq, 22 mart kuni bo'lib o'tadigan Liga kubogi finalida u o'z o'rnida bo'lishi mumkin, chunki diskvalifikatsiya ichki kubok finaliga ta'sir qilmaydi.
Gvardiola bu holatni hazilomuz qabul qilib, "Manchester Siti" bilan barcha rekordlarni yangilaganini va endilikda murabbiylar orasida eng ko'p sariq kartochka olgan mutaxassisga aylanganini aytdi. "Men barcha rekordlarni xohlayman va bunga ham erishdim.
Endi ikki o'yin davomida dam olaman", — dedi u. Shuningdek, Gvardiola o'z futbolchilarini har qanday vaziyatda himoya qilishda davom etishini va hakamlarning ba'zi qarorlarini tushunish qiyinligini ta'kidladi.
Manba: One.uz.
