City Xtra Husanovni Real Madridga qarshi o‘yinida yorqin ko‘rsatganini ta’kidladi
Angliya futbolida haligacha Manchester Siti va Real Madrid o‘rtasidagi muhim to‘qnashuv muhokamalar markazida qolmoqda. Bu haqda Zamin.uz xabar berdi.
Ushbu bahs yuzasidan turli ekspertlar o‘z fikr va tahlillarini bildirmoqda. Nufuzli City Xtra sayti ham ushbu o‘yinni chuqur tahlil qilib, ayniqsa o‘zbekistonlik himoyachi Abduqodir Husanovning o‘yiniga alohida to‘xtaldi.
Ma’lum qilinishicha, Siti ketma-ket uchinchi marta Realga mag‘lub bo‘lib, Chempionlar ligasi bilan xayrlashgan bo‘lsa-da, Etihaddagi oxirgi uchrashuvda ijobiy jihatlar ham yetarlicha kuzatildi. Hujumda Rayan Sherki va Jeremi Dok-u faol o‘yin namoyish etgan bo‘lsa, himoyada esa asosiy yuk aynan Husanov zimmasiga tushdi.
Ayniqsa, raqib safidagi Federiko Valverde, Kilian Mbappe va Vinisius Junior kabi yuqori darajadagi hujumchilar bosimiga qarshi tura olgan yagona futbolchi sifatida Husanov ajralib turdi. Uning tezkorligi, jismoniy kuchi va qat’iy harakatlari ko‘plab xavfli vaziyatlarni bartaraf etishga yordam berdi.
Abduqodir Husanov Sitinga qo‘shilganiga bir yildan oshdi va u klubga 2024–2025-yillardagi murakkab davrni barqarorlashtirish maqsadida olib kelingan futbolchilardan biri edi. Qizig‘i shundaki, u atigi ikki yillik professional tajribaga ega bo‘lib, 2023-yilgacha Belarusning Energetik-BGU jamoasida to‘p surgan, keyin esa Fransiyaning Lans klubiga o‘tgan.
Dastlab u asosiy tarkibga kirishda qiyinchilikka duch keldi, ammo qisqa vaqt ichida o‘z ornini topdi va 2024-yilda jamoaning yetakchi himoyachilari qatoriga qo‘shildi. Uning tez tiklanishi, agressiv o‘yin uslubi va jismoniy ustunligi Yevropa klublarining e’tiborini tortib, 2025-yil yanvarda Siti uni o‘z safiga qo‘shib oldi.
Premer-ligadagi ilk o‘yini unchalik omadli bo‘lmagan, debyutdagi xatosi Chelsiga gol urish imkonini bergan. Shu holat uzoq vaqt tanqidlarga sabab bo‘lgan bo‘lsa-da, keyinchalik Husanov o‘z o‘yini bilan bu fikrlarni yo‘qqa chiqardi.
U hatto 2025-yil fevral oyida Etihad da oyning eng yaxshi futbolchisi deb topildi va bu yutuqni 2026-yil yanvarda yana takrorladi. Jamoadagi jarohatlar va forma pasayishi sababli u turli pozitsiyalarda sinab ko‘rildi.
Ayniqsa, markaziy himoyachilar Ruben Diash va Yoshko Gvardiol safdan chiqqan paytda Husanov o‘zining haqiqiy salohiyatini namoyon etdi. Realga qarshi o‘yin esa uning rivojlanish darajasini yanada ochib berdi.
U 59 ta uzatmaning 58 tasini aniq bajarib, Pep Gvardiola uslubiga qanchalik tez moslashayotganini namoyish qildi. Shuningdek, u bir necha bor Vinisiusni to‘xtatib, hatto Braim Diasning xavfli hujumini aniq podkat bilan bartaraf etdi.
Husanovning o‘yini nafaqat murabbiylar, balki muxlislar tomonidan ham yuqori baholanmoqda. U qisqa vaqt ichida Siti muxlislari orasida sevimli futbolchilardan biriga aylandi.
Ekspertlar fikricha, hatto Mark Gexi kabi raqobatchilar bo‘lishiga qaramay, Husanov allaqachon asosiy tarkib uchun jiddiy da’vogarga aylangan. Uning bugungi o‘yini ham, kelajakdagi salohiyati ham klub uchun ulkan boylik hisoblanadi.
Manba: City Xtra
