"Shtutgart" Nyubelning o'rniga yangi darvozabon sotib olmaydigan bo'ldi
Germaniyaning Shtutgart klubi yangi mavsum oldidan darvozabonlar tarkibida jiddiy o'zgarishlarni amalga oshirishga qaror qildi. Bu haqda Zamin.uz xabar berdi.
Jamoaning asosiy posboni Aleksandr Nyubel uch yillik ijara muddati yakunlangach, o'zining doimiy klubi bo'lmish Bavariya ixtiyoriga qaytishi kutilmoqda. Goal.com nashri bergan ma'lumotlarga ko'ra, klub rahbariyati Nyubelning o'rniga tashqaridan yangi futbolchi sotib olmaslikka va ichki imkoniyatlardan unumli foydalanishga qaror qilgan.
Kelgusi mavsumda jamoaning asosiy darvozaboni vazifasini Dennis Zaymen bajaradigan bo'ldi. U Paderborn 07 klubidagi muvaffaqiyatli ijara muddatini yakunlab, o'z jamoasiga qaytmoqda.
Zaymen Germaniyaning eng iqtidorli yosh posbonlaridan biri hisoblanadi va ikkinchi Bundesligadagi ishonchli o'yinlari orqali mutaxassislar e'tiborini qozonishga ulgurdi. Murabbiylar shtabi uning salohiyatiga yuqori baho bermoqda.
Shu bilan birga, Shtutgart kelajak uchun ham poydevor yaratishda davom etmoqda. Klub 18 yoshli Florian Xellstern bilan amaldagi shartnomani 2030-yilgacha uzaytirishga erishdi.
Hozirda u uchinchi ligada ishtirok etayotgan zaxira jamoasi sharafini himoya qilmoqda. Xellstern o'z intervyusida bunday yoshda professional darajada faoliyat yuritish katta tajriba ekanini va asosiy tarkibga kirish uchun o'z ustida tinimsiz ishlashda davom etishini ta'kidlab o'tdi.
Aleksandr Nyubelning kelajagi esa hamon mavhumligicha qolmoqda. U Myunxen klubida zaxira o'rindig'ida o'tirishni istamayapti, biroq Bavariya rahbariyati Manuel Nojer bilan hamkorlikni davom ettirib, kelajakda asosiy darvozabon o'rnini Yonas Urbigga topshirishni rejalashtirmoqda.
Ayni paytda Nyubelning transfer narxi 20-25 million yevro atrofida baholanmoqda va u faoliyatini boshqa jamoada davom ettirishi ham ehtimoldan xoli emas.
