Aleksandr Isak jarohat sabab «Manchester Yunayted»ga qarshi o'yinni o'tkazib yuboradi

Liverpul jamoasining hujum chizig'ida jiddiy muammolar yuzaga kelmoqda. Bu haqda Zamin.uz xabar berdi.

Jamoa hujumchisi Aleksandr Isak chov qismidan olgan jarohati sababli Manchester Yunayted klubiga qarshi kechadigan muhim bahsni o'tkazib yuboradigan bo'ldi. Shvetsiyalik futbolchi navbatdagi mashg'ulotlar jarayonida kutilmaganda jarohat orttirib olgan.

Bu haqda Goal.com nashri ma'lumot tarqatdi. Mazkur holat jamoa bosh murabbiyi Arne Slot uchun kutilmagan zarba va katta yo'qotish bo'ldi, chunki oldinda turgan o'yin jamoaning kelgusi rejalari uchun juda muhim hisoblanadi.

Yigirma olti yoshli hujumchi Nyukasl tarkibidan 130 million funt sterling evaziga transfer qilingan edi. Biroq uning Enfilddagi debyut mavsumi ketma-ket jarohatlar tufayli ko'ngildagidek kechmayapti.

Isak joriy mavsum davomida bor-yo'g'i 13 ta uchrashuvda maydonga tushib, raqiblar darvozasini uch bor ishg'ol qilishga erishdi xolos. Jamoaning yana bir hujumchisi Ugo Ekitike ham jiddiy jarohat sababli mavsum oxirigacha safdan chiqqanini inobatga olsak, Liverpul Old Trafforddagi uchrashuvga asosiy hujumchilarisiz yo'l olishga majbur bo'ladi.

Vaziyatni yanada murakkablashtiradigan jihati shundaki, jamoa yetakchisi Muhammad Salah ham mushaklaridagi og'riq tufayli ushbu bahsda ishtirok eta olmaydi. Jarohatlar bilan bog'liq muammolar fonida misrlik futbolchi mavsum yakunida klubni tark etish niyatida ekanini ma'lum qildi.

O'ttiz uch yoshli hujumchi ushbu qarorga jamoaning sobiq sardori Stiven Jerrard bilan maslahatlashganidan so'ng kelganini ta'kidladi. Manchester Yunayted va Liverpul o'rtasidagi bo'lajak uchrashuv Chempionlar ligasi yo'llanmasi uchun kurashda hal qiluvchi ahamiyatga ega.

Maykl Karrik boshchiligidagi mankunianliklar o'tgan yilning oktyabr oyida Enfild stadionida kechgan bahsda 2:1 hisobida g'alaba qozonishgan edi. Endilikda har ikki jamoa ham turnir jadvalidagi o'rnini mustahkamlash uchun bor imkoniyatini ishga soladi.