«Real Madrid» futbolchilari mashg‘ulot paytida o‘zaro janjallashib qoldi
Ispaniyaning Real Madrid klubi ichida jiddiy nizolar yuzaga kelgani haqida xabarlar tarqalmoqda. Bu haqda Zamin.uz xabar berdi.
Mashg‘ulotlar jarayonida kelib chiqqan navbatdagi kelishmovchilik Federico Valverde va Aurelien Tchouameni o‘rtasidagi jismoniy to‘qnashuvga aylanib ketgan. Ma’lumotlarga ko‘ra, ushbu janjal oqibatida Valverde tan jarohati olgan va tibbiy yordam ko‘rsatish uchun shifoxonaga yuborilgan.
Goal.com nashrining xabar berishicha, mazkur hodisa jamoa ichidagi ma’naviy muhitni butunlay izdan chiqargan. Yuzaga kelgan keskin vaziyatni yumshatish va kiyinish xonasidagi tartibni tiklash maqsadida murabbiy Alvaro Arbeloa futbolchilar bilan shoshilinch yig‘ilish o‘tkazdi.
Hozirda jamoa a’zolari o‘rtasidagi munosabatlar o‘ta sovuqlashgani aytilmoqda. Bu kabi ichki nizolar klubning umumiy natijalariga salbiy ta’sir ko‘rsatishi tayin.
Ayniqsa, La Liga turnir jadvalida Barselona jamoasi yaqqol peshqadamlik qilayotgan bir paytda, Madrid klubi uchun har bir ochko va jamoaviy birlik suv bilan havodek zarurdir. Oldinda jamoani mavsumning eng muhim bahslaridan biri bo‘lgan El Klasiko kutib turibdi.
Shunday mas’uliyatli pallada sodir bo‘lgan ko‘ngilsiz voqealar muxlislar xavotiriga sabab bo‘lmoqda. Vaziyatga jamoaning yangi yulduzi Kylian Mbappening munosabati ham olovga moy sepgandek bo‘ldi.
Ijtimoiy tarmoqlarda uning mashg‘ulotlar bazasini xushkayfiyatda tark etayotgani aks etgan tasvirlar tarqalishi ko‘plab e’tirozlarni keltirib chiqardi. Mbappening vakillari esa uning harakatlarida hech qanday yomon niyat yo‘qligini va futbolchi o‘z ishiga professional darajada yondashayotganini ta’kidlamoqda.
Klub rahbariyati hozircha ushbu voqealar yuzasidan rasmiy bayonot bergani yo‘q.
