O‘zbekiston milliy terma jamoasi murabbiylaridan biri Vlado Radmanovich BAAga qarshi o‘tkazilgan hal qiluvchi bahsdan so‘ng o‘yin va umumiy saralash jarayoniga baho berdi. Murabbiy jahon chempionati yo‘llanmasi qo‘lga kiritilganini o‘zbekistonliklar uchun tarixiy voqea sifatida baholadi.
“Bu to‘rt yil juda qiziqarli, biroq ayni paytda o‘ta murakkab va sinovlarga to‘la bo‘ldi. Qanday murakkab yo‘lni bosib o‘tganimizni barchangiz yaxshi bilasiz. Janob Katanes bilan bog‘liq voqealarni unutib bo‘lmaydi. Achinarlisi, bugun u bizning oramizda emas. Lekin undan boshlangan jarayon bugun o‘z mevasini berdi. Nihoyat, biz bu yo‘llanmani qo‘lga kiritdik va barcha mehnatlarimiz o‘z samarasini berdi,” — dedi Vlado Radmanovich o‘yindan so‘ng jurnalistlarga.
Murabbiyning ta’kidlashicha, bu muvaffaqiyat nafaqat terma jamoa uchun, balki butun O‘zbekiston xalqi uchun haqiqiy tantanaga aylangan. “Bu g‘alaba — O‘zbekistondagi millionlab futbol ishqibozlari, qo‘llab-quvvatlovini ayamagan muxlislar uchun haqiqiy bayramdir. Ular bizni doimo ishonch bilan qarshi olishdi, so‘nggi daqiqalargacha ishonishdi va bu biz uchun katta kuch bo‘ldi,” — deb ta’kidladi u.
Radmanovich jamoa ichidagi birdamlik va barqaror ishlash muhitini alohida e’tirof etdi. Uning fikricha, ana shu omillar jahon chempionati sari olib borgan asosiy kuchlardan biri bo‘lgan.
“Biz har bir qiyinchilikni birga yengdik, o‘z kuchimizga ishondik va qat’iyat bilan harakat qildik. Bu murabbiylar shtabi, futbolchilar, texnik guruh va butun futbol jamoasi uchun haqiqiy sinov yili bo‘ldi,” — dedi murabbiy.
O‘zbekiston milliy terma jamoasining JCH-2026 musobaqasiga yo‘l olishini jahon futbol olamida muhim voqea sifatida baholash mumkin. Hozirgi natija orqali nafaqat sport, balki O‘zbekiston brendi ham xalqaro miqyosda yanada yuksalmoqda.
Zamin.uz tahririyati jamoamizni yanada katta yutuqlar kutmoqda, deb umid qiladi va keyingi bosqichda ham ularga omad tilab qoladi.
