Yevropa transfer bozorida qizg‘in kurash avjida. Bu safar diqqat markazida — "Real Sosedad"ning iqtidorli yarim himoyachisi Martin Zubimendi. Ilgari ushbu futbolchining "Arsenal" bilan kelishuvga erishgani va u hatto tibbiy ko‘rikka tayyorlanayotgani haqida xabarlar tarqalgandi. Biroq vaziyat yangi burilish oldi.
AS nashri tarqatgan so‘nggi ma’lumotlarga ko‘ra, Madridning "Real" klubi yangi bosh murabbiy Xabi Alonsoning talabiga binoan Zubimendini o‘z tarkibiga qo‘shib olishni rejalashtirmoqda. Madridliklar "Sosedad" bilan munosabatlar yaxshi ekanini inobatga olgan holda, muzokaralar muvaffaqiyatli yakun topishiga ishonmoqda.
Ma’lumotlarga ko‘ra, Martin Zubimendi o‘zi tanish va mahalliy muhitda qolishga, ya’ni La Ligada to‘p surishga qiziqmoqda. Unga “qirollik klubi”ning nufuzi va ambitsiyalari juda ham manzur tushgan. Shu sababdan u "Arsenal" bilan bo‘layotgan kelishuvni vaqtincha to‘xtatishga tayyor.
Madrid klubi yarim himoyachining 60 million yevroga baholanayotgan transferi uchun pullik to‘lovning bir qismini "Kastilya" tarkibidan bir futbolchini bepul ijaraga berish orqali kompensatsiyalashni rejalashtirmoqda. Hatto asosiy jamoa a’zolaridan kimdir kelishuvga qo‘shilishi mumkinligi ham inkor etilmayapti.
"Real" Zubimendiga birinchi mavsum uchun 6–7 million yevro atrofida maosh to‘lashga tayyor. "Arsenal" esa soliq to‘langanidan keyin yiliga 10 million yevro maosh taklif qilmoqda. Shunga qaramay, futbolchining ichki xohishi Madridda to‘p surishga moyil bo‘lib turibdi.
