Rayan Sherki: “Siti”dagi yangi hayotimni intiqlik bilan kutyapman
Yevropa transfer bozorining eng qizg‘in voqealaridan biri amalga oshdi — “Lion”ning yosh iste’dodi Rayan Sherki rasman “Manchester Siti” safida. 21 yoshli fransiyalik yarim himoyachi uchun angliyaliklar 36,5 million yevro va qo‘shimcha 6 million yevro bonus to‘lashdi. Bu bitim nafaqat muxlislar, balki futbol ekspertlari orasida ham katta qiziqish uyg‘otdi.
Sherki yangi jamoasiga kelib qo‘shilganidan so‘ng klub rasmiy saytiga samimiy intervyu berdi. “Men uchun bugungi kun faoliyatimdagi eng muhim bosqichlardan biri. “Manchester Siti” — Yevropadagi eng yirik va nufuzli jamoalardan biri. Ularning zamonaviy va dinamik o‘yin uslubi men uchun o‘ziga xos ilhom manbai. Bu jamoada o‘ynash imkoniyatiga ega bo‘lishni uzoq kutgan edim,” — dedi talantli futbolchi.
Sherki bu qarorini shaxsiy tanlov sifatida baholadi va o‘z faoliyatida yangi bosqichni boshlayotganidan mamnun ekanini ta’kidladi: “Ishonamanki, aynan “Siti” safida yangi yuksakliklarni zabt etish men uchun eng to‘g‘ri yo‘l. Bu klub menga o‘z salohiyatimni to‘liq namoyish etish, katta o‘yinlarda ishtirok etish va yangi tajriba orttirish imkonini beradi.”
Ayniqsa, yosh yulduz bosh murabbiy Pep Gvardiola haqida ham e’tiroflar bilan to‘lib-toshdi: “Pep — bugungi kunda nafaqat Yevropada, balki butun dunyodagi eng yaxshi murabbiylardan biri, balki u futbol tarixida ham o‘chmas iz qoldirgan shaxs. Uning qo‘l ostida o‘ynash — men uchun orzu edi va endi bu orzu amalga oshdi!”
Yangi mavsumdan boshlab Rayan Sherki “Siti” libosida maydonga tushib, o‘zining texnik mahorat va ilhomga to‘la o‘yini bilan ingliz jamoasi muxlislarini xursand etishga harakat qiladi. Fransiya terma jamoasining yosh iqtidorli a’zosi sifatida Sherkining Angliya chempionatida qanday namoyon bo‘lishi futbol olamida katta qiziqish uyg‘otmoqda.
