Qishloq xo‘jaligida dron xizmatlari joriy etiladi
O‘zbekiston Respublikasi Prezidentining «Qishloq xo‘jaligi sohasiga zamonaviy texnologiyalarni joriy etishni jadallashtirish va samaradorlikni oshirish chora-tadbirlari to‘g‘risida»gi farmoniga muvofiq, agrar tashkilotlarda robototexnika va dronlar yordamida xizmatlar yo‘lga qo‘yiladi. Bu haqida Zamin.uz xabar berdi.
Ushbu xizmatlar qishloq xo‘jaligida ishlarni samarali va tez bajarishga imkon beradi. Endi dron xizmatlaridan foydalanish uchun Agroportal orqali onlayn tarzda ariza berish, shartnoma tuzish va to‘lovlarni amalga oshirish mumkin bo‘ladi.
Ma’lumotlarga ko‘ra, Agroportal orqali 30 metr balandlikgacha uchuvchi dronlar xizmatidan foydalanish imkoniyati yaratiladi. Dronlar faqat tegishli idoralar bilan kelishilgan hududlarda, ular tomonidan berilgan yillik ruxsatnomalar asosida ishlatiladi.
Bu esa xizmatlarning qonuniy va tartibli amalga oshirilishini ta’minlaydi. Qishloq xo‘jaligida zamonaviy texnologiyalarni keng joriy etish orqali ishlab chiqarish samaradorligini oshirish va resurslardan oqilona foydalanish maqsad qilingan.
Shu bilan birga, agrar sohada innovatsion yondashuvlarni rivojlantirish va raqobatbardoshlikni kuchaytirish rejalashtirilgan. Dron xizmatlarining keng joriy etilishi qishloq xo‘jaligi sohasida ishlarni avtomatlashtirish va sifatni yaxshilashga katta hissa qo‘shadi.
Bu esa mamlakatimiz qishloq xo‘jaligi mahsulotlari ishlab chiqarish hajmini oshirishga xizmat qiladi.
