Inson tana haroratidan energiya olish texnologiyasi yaratildi
Xitoylik olimlar inson tana haroratidan foydalanib, smartfon va boshqa elektron qurilmalarni quvvatlantirishga imkon beruvchi yangi texnologiyani ixtiro qilishdi. Bu haqida Zamin.uz xabar berdi.
Ushbu kashfiyot South China Morning Post nashri tomonidan e’lon qilindi. Tadqiqotchilar maxsus rezina asosidagi material yaratdilar, u inson tanasidan chiqadigan issiqlikni elektr energiyasiga aylantira oladi.
Inson organizmining o‘rtacha harorati 37 daraja atrofida bo‘lib, atrof-muhit harorati esa 20 dan 30 daraja orasida o‘zgaradi. Harorat farqidan foydalanib, energiya ishlab chiqarish mumkinligi aniqlangan.
Ushbu texnologiya elektr ta’minoti mavjud bo‘lmagan hududlarda smartfon va boshqa gadjetlarni quvvatlantirish uchun qo‘llanilishi mumkin. Shuningdek, tibbiy uskunalar uchun quvvat manbai sifatida ham foydali bo‘ladi.
Materialni kiyim ichiga joylashtirish orqali telefonni doimiy ravishda qayta quvvatlash imkoniyati yaratiladi. Bundan tashqari, bu material inson tanasi uchun qulay harorat muhitini saqlashda ham yordam beradi.
Shu yo‘l bilan inson tana haroratidan samarali va xavfsiz tarzda foydalanish imkoniyati paydo bo‘lmoqda. Bu texnologiyaning kundalik hayotda keng qo‘llanilishi kutilmoqda.
