Yevropa venchur jamg‘armalari sun’iy ong yo‘nalishidagi istiqbolli startaplarni e’tirof etmoqda
Yevropa startap ekotizimida Lovable va Mistral AI kabi taniqli kompaniyalar bilan bir qatorda, sarmoyadorlar diqqat markazida turgan ko‘plab yangi va istiqbolli loyihalar mavjud. Bu haqda Zamin.uz xabar berdi.
Venchur jamg‘armalari vakillari sun’iy ong va murakkab texnologiyalar yo‘nalishida jadal rivojlanayotgan Yevropa startaplarini alohida e’tirof etmoqda. Bu boradagi tahliliy ma’lumotlar xalqaro texnologik nashrlar tomonidan taqdim etildi.
Xususan, Alta Ares kompaniyasi sun’iy ong imkoniyatlaridan foydalangan holda uchuvchisiz uchish qurilmalariga qarshi kurashish tizimlarini yaratish bilan shug‘ullanadi. Hozirgi kunda mudofaa texnologiyalariga bo‘lgan ehtiyoj ortib borayotgan bir paytda, mazkur loyiha bozorga nisbatan arzon va samarali yechimlarni taklif qilmoqda.
Apron loyihasi esa kichik biznes subyektlari uchun moliyaviy hisob-kitoblarni va to‘lov hujjatlarini boshqarish jarayonini soddalashtiruvchi xizmatlarni yo‘lga qo‘ygan. Botify platformasi yirik brendlarga sun’iy ong asosidagi qidiruv tizimlarida o‘z o‘rnini mustahkamlashga ko‘maklashadi.
Kompaniya an’anaviy qidiruv tizimlarini optimallashtirish usullaridan voz kechib, matn va ma’lumot yaratuvchi yangi avlod qidiruv tizimlariga moslashish strategiyasini tanlagan. BottleCap AI jamoasi esa ish unumdorligini oshirishga xizmat qiluvchi tayanch til modellari va maxsus ilovalar ustida ish olib bormoqda.
Aerokosmik va sanoat tarmoqlari uchun fotonika texnologiyalarini rivojlantirayotgan Cailabs hamda qayta tiklanuvchi energiya manbalaridan foydalanish samaradorligini oshirayotgan Shvetsiyaning Flower kompaniyasi sarmoyadorlar e’tiboridan chetda qolgani yo‘q. Flower kompaniyasi shamol va quyosh energiyasini ishlab chiqarish hajmini aniq bashorat qilish uchun sun’iy ong hamda zamonaviy akkumulyator tizimlarini birlashtirgan.
Shuningdek, Fundamental kompaniyasining Nexus modeli yirik korxonalarga ulkan hajmdagi ma’lumotlarni tahlil qilishda yordam bermoqda. Inbolt loyihasi esa avtomobilsozlik va elektronika sanoatida ishlab chiqarish jarayonlarini avtomatlashtirish maqsadida robototexnika hamda sun’iy ong imkoniyatlarini uyg‘unlashtirgan holda yangi yechimlarni taqdim etmoqda.
Ushbu loyihalar Yevropaning texnologik kelajagini belgilab beruvchi asosiy omillar sifatida qaralmoqda.
