MediaTek hamyonbop smartfonlar uchun yangilangan Helio G99+ protsessorini taqdim etdi
MediaTek kompaniyasi hamyonbop smartfonlar segmenti uchun mo‘ljallangan o‘zining eng ommabop protsessorlaridan biri – Helio G99 platformasining takomillashtirilgan versiyasini rasman taqdim etdi. Bu haqda One.uz xabar beradi.
Yangi chip Helio G99+ deb nomlandi va uning asosiy o‘zgarishi tezkor xotira bilan ishlash imkoniyatlarini kengaytirishga qaratilgan. Mazkur yangilanish qurilmalarning umumiy ish unumdorligini oshirish bilan birga, ishlab chiqaruvchilarga butlovchi qismlar bozoridagi o‘zgarishlarga moslashish imkonini beradi.
Texnik xususiyatlar va modernizatsiya Yangi platforma avvalgi muvaffaqiyatli modelning asosiy arxitekturasini to‘liq saqlab qolgan holda, zamonaviy texnik talablarga moslashtirildi. Ushbu protsessor TSMC kompaniyasining 6 nanometrli texnologik jarayoni asosida ishlab chiqarilishida davom etmoqda, bu esa energiya samaradorligi va yuqori quvvat muvozanatini ta’minlaydi.
Protsessorning yadro tuzilishi o‘zgarishsiz qoldi: u ikkita 2,2 GGs chastotali Cortex-A76 va oltita 2,0 GGs chastotali Cortex-A55 yadrolarini o‘z ichiga oladi. Grafik vazifalar uchun esa avvalgidek Mali-G57 MC2 tezlatkichi mas’ul etib belgilangan.
Bu esa foydalanuvchilar o‘rganib qolgan barqarorlikni saqlab qoladi. Asosiy o‘zgarish tezkor xotirani qo‘llab-quvvatlash qismida ro‘y berdi.
Agar avvalgi versiya maksimal tezligi soniyasiga 4266 megabit bo‘lgan LPDDR4X xotirasi bilan ishlagan bo‘lsa, yangilangan Helio G99+ modeli zamonaviy LPDDR5X xotirasini qo‘llab-quvvatlaydi. Natijada ma’lumotlar almashish tezligi soniyasiga 5500 megabitgacha yetkazildi, bu esa tizimning umumiy chaqqonligiga ijobiy ta’sir ko‘rsatadi.
Bozor talablari va iqtisodiy omillar Boshqa texnik imkoniyatlar deyarli o‘zgarmagan. Xususan, chip UFS 2.2 turdagi doimiy xotirani, 108 megapikselgacha bo‘lgan kameralarni hamda to‘rtinchi avlod aloqa tarmoqlarida barqaror ishlashni ta’minlovchi modemni qo‘llab-quvvatlashda davom etadi.
Mutaxassislarning ta’kidlashicha, mazkur yangilanish tubdan yangi avlod platformasi emas, balki sinovdan o‘tgan yechimning manzilli takomillashtirilishidir. Helio G99+ chipining yaratilishiga operativ xotira bozoridagi global o‘zgarishlar asosiy sabab bo‘ldi.
Jahon ishlab chiqaruvchilari o‘z quvvatlarini asta-sekin yangi avlod xotira turlariga o‘tkazmoqda. Oqibatda eski turdagi xotira qurilmalarining ishlab chiqarilishi qisqarib, ularning narxi oshib bormoqda.
Yangi protsessor smartfon ishlab chiqaruvchi kompaniyalarga zamonaviyroq va keng tarqalgan xotira turlaridan foydalanish imkonini beradi. Bu esa o‘z navbatida hamyonbop smartfonlarning tannarxini nazorat ostida saqlash va ularni xaridorlar uchun jozibador narxlarda taklif etishga xizmat qiladi.
