LG kompaniyasining aqlli televizorlari foydalanuvchilar suhbatini yashirincha yozib olmoqda
Zamonaviy texnologiyalar inson hayotini yengillashtirish bilan birga, shaxsiy hudud daxlsizligiga raxna soluvchi vositaga aylanib bormoqda. Bu haqda One.uz xabar beradi.
Gamers Nexus tadqiqotchilar jamoasi tomonidan o‘tkazilgan surishtiruv natijasida LG kompaniyasining aqlli televizorlari foydalanuvchilarning suhbatlarini yashirincha yozib olishi va bu ma’lumotlarni markaziy serverlarga yuborishi aniqlandi. Mazkur jarayon hatto televizor ekrani o‘chiq holatda bo‘lganda ham davom etishi isbotlangan bo‘lib, butun dunyo bo‘ylab, jumladan, O‘zbekiston bozoridagi millionlab qurilmalarni qamrab olgan.
Tadqiqotlar shuni ko‘rsatadiki, qurilma internetdan uzilgan taqdirda ham ma’lumotlarni ichki xotirasida saqlab qoladi va aloqa tiklanishi bilan ularni uzatadi. Aqlli qurilmalarning yashirin faoliyati Yillar davomida qulaylik ramzi sifatida taqdim etilgan aqlli televizorlar ortida jiddiy xavfsizlik muammolari yashiringanligi ma’lum bo‘ldi.
Mutaxassislar maxsus texnik sinovlar orqali televizor ekrani o‘chiq ko‘ringan vaqtda ham uning mikrofoni faol ishlashini va atrofdagi tovushlarni yozib olishini tasdiqlashdi. Bu tizim shunchalik mukammal ishlanganki, agar foydalanuvchi xavfsizlik maqsadida internetni o‘chirib qo‘ysa, qurilma to‘plangan audio fayllarni o‘z xotirasida jamlab boradi.
Tarmoqqa qayta ulanish amalga oshirilishi bilan barcha ma’lumotlar kompaniya serverlariga yo‘naltiriladi. Ushbu muammo faqatgina ovoz yozib olish bilan cheklanib qolmaydi.
Aqlli televizorlar xonadondagi boshqa qurilmalarni, ya’ni smartfonlar, noutbuklar va aqlli soatlarni ham skanerdan o‘tkazish qobiliyatiga ega. Hattoki qo‘shni xonadonlarning ochiq simsiz tarmoqlari haqidagi ma’lumotlar ham tizim tomonidan to‘planadi.
Hozirgi kunda dunyo bo‘ylab 216 milliondan ortiq shunday qurilmalar mavjud bo‘lib, bu shaxsiy ma’lumotlar xavfsizligi bo‘yicha global miqyosdagi eng yirik tahdidlardan biri sifatida baholanmoqda. Korporativ manfaatlar va shaxsiy daxlsizlik Foydalanuvchilarning shaxsiy hayotiga bu darajada aralashishning asosiy sababi iqtisodiy manfaatlar bilan bog‘liq.
Yirik texnologik korporatsiyalar faqatgina qurilma sotishdan emas, balki to‘plangan ma’lumotlarni reklama beruvchilarga sotish orqali ham ulkan daromad ko‘radi. Avtomatik kontentni tanish tizimi yordamida ekranda nima ko‘rilayotgani har soniyada tahlil qilinadi va sun’iy intellekt yordamida foydalanuvchiga moslashtirilgan reklamalar taqdim etiladi.
Ko‘pincha foydalanuvchilar televizorni ilk bor ishga tushirayotganda, ko‘p sahifali litsenziya kelishuvlarini o‘qib chiqmasdan tasdiqlashadi. Aynan mana shu hujjatlar orasida shaxsiy ma’lumotlarni to‘plashga ruxsat beruvchi bandlar ustalik bilan yashirilgan bo‘ladi.
Mustaqil muhandislarning bu boradagi jasorati va texnik tahlillari milliardlab dollarlik daromadga ega bo‘lgan gigant kompaniyalarning yashirin faoliyatini jamoatchilikka oshkor qildi. Bu holat zamonaviy dunyoda texnologiyalardan foydalanishda naqadar ehtiyotkor bo‘lish zarurligini yana bir bor eslatib o‘tadi.
