«Porsche» kompaniyasi yana besh ming nafar xodimini ishdan bo‘shatadi

Germaniyaning Porsche AG avtomobil ishlab chiqaruvchi kompaniyasi kuzatuv kengashining so‘nggi yig‘ilishidan so‘ng xodimlar sonini yana 5 ming nafarga qisqartirishini e’lon qildi. Bu haqda One.uz xabar beradi.

Ushbu qaror avvalroq rejalashtirilgan ish o‘rinlarini kamaytirish dasturiga qo‘shimcha sifatida qabul qilingan bo‘lib, 2035-yilgacha jami 9 400 dan ortiq xodimning ish joyini yo‘qotishiga sabab bo‘ladi. Kompaniya rahbariyati bunday keskin choralarni iqtisodiy inqiroz sharoitida xarajatlarni tejash, raqobatbardoshlikni saqlab qolish va moliyaviy barqarorlikni ta’minlash zarurati bilan izohlamoqda.

Yangi qabul qilingan qarorga ko‘ra, qo‘shimcha qisqartirishlar asosan Shtutgart-Suffenxauzendagi asosiy ishlab chiqarish zavodi hamda Vaysax shahridagi ilmiy-tadqiqot markazi xodimlariga daxldor bo‘ladi. Reuters agentligi tahlilchilarining fikricha, bu o‘zgarishlar kompaniyadagi deyarli har beshinchi ish o‘rniga ta’sir ko‘rsatadi.

Porsche rahbariyati jarayonni imkon qadar yumshoq tarzda amalga oshirishga va’da bermoqda. Bunda asosan yoshi katta xodimlarning pensiyaga chiqishi, kadrlar almashinuvi va tomonlarning o‘zaro roziligi asosida shartnomalarni bekor qilish kabi usullardan foydalaniladi.

Ish haqi va ijtimoiy imtiyozlarning cheklanishi Kompaniya faqat xodimlar sonini kamaytirish bilan cheklanib qolmasdan, mehnat sharoitlari va ijtimoiy paketlarga ham jiddiy o‘zgartirishlar kiritmoqda. Xususan, jamoaviy shartnomada ko‘zda tutilgan ish haqini oshirish rejasining 3,5 foizi ushlab qolinadi.

Shuningdek, xodimlar uchun an’anaviy bo‘lgan Rojdestvo bayrami mukofotlari ham sezilarli darajada kamaytirilib, bir oylik maoshning 100 foizi o‘rniga 60 foiz miqdorida to‘lanadigan bo‘ldi. Masofadan ishlash tartibiga ham cheklovlar o‘rnatilmoqda.

Endilikda xodimlarning uydan turib ishlash imkoniyati oyiga 12 kundan 8 kunga tushirildi. Shu bilan birga, IG Metall kasaba uyushmasi bilan kelishilgan holda, xodimlarga ma’lum miqdorda bir martalik kompensatsiya to‘lovlari va qo‘shimcha bonuslar berilishi ko‘zda tutilgan.

Bu choralar kompaniya xarajatlarini maqbullashtirishga xizmat qilishi kutilmoqda. Moliyaviy ko‘rsatkichlar va kelajakdagi investitsiyalar Porsche avtogigantining bunday keskin choralarga qo‘l urishiga sabab bo‘lgan asosiy omillardan biri moliyaviy foydaning keskin kamayib ketganidir.

Ma’lumotlarga ko‘ra, 2025-yilda kompaniyaning sof foydasi 91 foizga pasayib, 310 million yevroni tashkil etgan. Bu ko‘rsatkich kompaniya uchun kutilmagan darajada past natija hisoblanadi.

Shunga qaramay, Porsche rahbariyati ishlab chiqarishni modernizatsiya qilishdan voz kechmoqchi emas. Rejaga ko‘ra, 2035-yilgacha ishlab chiqarish quvvatlarini rivojlantirish uchun 2,1 milliard yevro miqdorida investitsiya kiritiladi.

Kompaniya ushbu mablag‘lar evaziga texnologik jarayonlarni yangilashni va uzoq muddatli istiqbolda qolgan ish o‘rinlarini saqlab qolishni maqsad qilgan. Hozirgi o‘zgarishlar esa Porsche brendining jahon bozoridagi o‘rnini qayta tiklash yo‘lidagi muhim qadam sifatida baholanmoqda.