Parijdagi Milliy tabiiy tarix muzeyida oltin o‘g‘irlandi
Fransiya poytaxti Parijda joylashgan Milliy tabiiy tarix muzeyida katta o‘g‘irlik sodir bo‘ldi. Bu haqda Zamin.uz xabar berdi.
Actu17 portali xabariga ko‘ra, hodisa dushanba kechasidan seshanba tongigacha bo‘lgan vaqt oralig‘ida yuz berdi. Natijada muzeyga katta moddiy zarar yetkazildi.
Qaroqchilar muzeyga oldindan puxta tayyorgarlik bilan kirib, himoya tizimini a’lo darajada chetlab o‘tishga muvaffaq bo‘lishdi. Ular jami oltita oltin quymasini o‘g‘irlab ketdi.
Ushbu oltin qumasining umumiy qiymati taxminan 600 ming yevroga teng bo‘lib, bu so‘nggi yillarda Fransiyadagi eng yirik muzey o‘g‘irliklaridan biri hisoblanadi. Hozirda voqea bo‘yicha tergov ishlari olib borilmoqda.
Fransiya sud politsiyasining banditizmga qarshi maxsus brigadasi ishni nazoratga olib, o‘g‘irlikni sodir etgan shaxslarni aniqlash uchun barcha imkoniyatlarni ishga solmoqda. Tergovchilar qaroqchilarning harakatlari aniq reja asosida amalga oshirilganligini ta’kidlamoqda.
Milliy tabiiy tarix muzeyi Fransiyada eng yirik ilmiy tadqiqot markazlaridan biri bo‘lib, unda laboratoriyalar, kutubxonalar, botanika bog‘i va Vinsen hayvonot bog‘i mavjud. Shu sababli muzey nafaqat ilmiy, balki madaniy va ma’rifiy ahamiyatga ham ega.
Shuningdek, avgust oyida muzey kiberhujumga uchragani haqida ham xabarlar berilgan edi. Bu hujum natijasida onlayn tadqiqotlar, kutubxona faoliyati va ekspertizalar o‘tkazish qiyinlashgan edi.
Hozirgi o‘g‘irlik voqeasi muzeydagi xavfsizlik tizimlarining samaradorligi haqida ko‘plab savollarni keltirib chiqarmoqda. Tergov jarayoni davom etmoqda va muhim ma’lumotlar tez orada e’lon qilinishi kutilmoqda.
