Barak Obama o'zga sayyoraliklar haqidagi maxfiy ma'lumotlar borasida munosabat bildirdi
Amerika Qo'shma Shtatlarining sobiq prezidenti Barak Obama o'zga sayyoraliklar va ular bilan bog'liq sirli ma'lumotlar borasidagi qarashlarini bayon qilib, yana jamoatchilik e'tiborini o'ziga qaratdi. Bu haqda Zamin.uz xabar berdi.
Uning ta'kidlashicha, agar mamlakat hukumatida haqiqatan ham o'zga sayyoraliklarga oid rad etib bo'lmaydigan maxfiy dalillar mavjud bo'lganida, bu xabarlar allaqachon xalq orasida tarqalib ketgan bo'lar edi. Sobiq davlat rahbari Vashingtondagi boshqaruv tizimida o'ta muhim ma'lumotlarni uzoq vaqt davomida butunlay yashirib qolish imkoniyati past ekanini alohida qayd etdi.
Barak Obama ushbu mavzuda biroz hazil aralash munosabat bildirib, davlat idoralaridagi axborot xavfsizligi masalasiga to'xtaldi. Uning so'zlariga ko'ra, agar biror joyda o'zga sayyoralik saqlanayotgan bo'lganida, qo'riqchilardan biri albatta u bilan suratga tushib, ushbu tasvirni kimgadir yuborgan bo'lar edi.
Bu bilan sobiq prezident bugungi texnologiyalar rivojlangan davrda bunday ulkan sirni yashirishning imkoni yo'qligiga ishora qildi. Sobiq prezident joriy yilning boshida ishtirok etgan turli muloqot va suhbatlarida ham mazkur mavzuni bir necha bor tilga olgan edi.
U koinotning cheksizligini inobatga olgan holda, o'zga sayyoralik hayot shakllari mavjud bo'lishi mumkinligini butunlay inkor etmaydi. Biroq, Obama ularning Yer sayyorasiga tashrif buyurgani yoki insoniyat bilan aloqaga chiqqani haqidagi taxminlarga shubha bilan qaraydi.
Shu bilan birga, Obama ko'plab afsona va mish-mishlarga sabab bo'lgan mashhur 51-hudud haqidagi savollarga ham javob berdi. U o'z prezidentlik davrida ushbu maxfiy obektda nimalar borligini tekshirib ko'rganini, ammo u yerda o'zga sayyoraliklar kemalari yoki boshqa g'ayritabiiy narsalar topilmaganini bildirdi.
Mazkur bayonotlar o'zga sayyoraliklar mavzusiga qiziquvchi ko'plab insonlar uchun muhim munosabat bo'lib xizmat qildi.
