Germaniyada muxolifat partiyasi mintaqaviy saylovlarda mutlaq g'alaba qozondi
Germaniyaning Saksoniya-Anhalt federal yerida o‘tkazilgan mintaqaviy parlament saylovlari mamlakat siyosiy hayotida katta shov-shuvga sabab bo‘ldi. Bu haqda One.uz xabar beradi.
Saylov byulletenlarining to‘liq hisoblab chiqilgan natijalariga ko‘ra, muxolifatdagi Germaniya uchun muqobil partiyasi 43,8 foiz ovoz to‘plab, mutlaq g‘alabani qo‘lga kiritdi. Bu ko‘rsatkich mintaqa tarixidagi eng yuqori natija bo‘lish bilan birga, amaldagi hukumat koalitsiyasi uchun jiddiy siyosiy zarba sifatida baholanmoqda.
Mintaqaviy saylov komissiyasi e’lon qilgan rasmiy ma’lumotlarga ko‘ra, siyosiy kuchlar o‘rtasidagi farq kutilganidan ancha yuqori bo‘ldi. Germaniya uchun muqobil partiyasi parlamentda yetakchi o‘rinni egallagan bo‘lsa, Xristian-demokratik ittifoqi 17,2 foiz ovoz bilan ikkinchi pog‘onada qoldi.
Ikki yetakchi partiya o‘rtasidagi farq 26 foizdan oshib ketgani nemis jamiyatidagi siyosiy qarashlar keskin o‘zgarganidan dalolat beradi. Siyosiy kuchlarning yangi taqsimoti Germaniya kansleri boshchiligidagi Sotsial-demokratik partiya uchun bu saylovlar muvaffaqiyatsiz yakunlandi.
Hukmron partiya bor-yo‘g‘i 9,3 foiz ovoz to‘plab, uchinchi o‘ringa tushib ketdi. Shuningdek, Yashillar partiyasi 8,9 foiz, So‘llar partiyasi esa 8,6 foiz natija qayd etdi.
Yaqinda tashkil etilgan Sara Vagenknext ittifoqi esa 5,3 foiz ovoz bilan parlamentga kirish uchun zarur bo‘lgan besh foizlik to‘siqdan o‘ta oldi. Saylovda aholining ishtiroki ham misli ko‘rilmagan darajada yuqori bo‘ldi.
Saylov huquqiga ega fuqarolarning 77,8 foizi ovoz berish jarayonlarida qatnashdi. Ekspertlar bunday yuqori faollikni aholining amaldagi ichki va tashqi siyosatdan noroziligi hamda tub o‘zgarishlarga bo‘lgan intilishi bilan bog‘lamoqda.
Saylovda jami 16 ta siyosiy partiya va qariyb 400 nafar nomzod o‘zaro raqobatlashdi. Federal hukumat uchun xavf qo‘ng‘irog‘i Saksoniya-Anhaltdagi saylov natijalari nafaqat bir mintaqa, balki butun Germaniya federal hukumati uchun jiddiy ogohlantirish hisoblanadi.
Tahlilchilarning fikricha, ushbu g‘alaba yaqin kunlarda Berlin deputatlar palatasi hamda boshqa hududlarda bo‘lib o‘tadigan saylovlarga bevosita ta’sir ko‘rsatadi. Muxolifatning bunday muvaffaqiyati mamlakatning migratsiya masalalari, energiya narxlari va tashqi yordam siyosatiga nisbatan xalqning munosabati o‘zgarganini tasdiqlamoqda.
Germaniyadagi ushbu siyosiy siljish Yevropa Ittifoqi doirasida ham aks-sado berishi kutilmoqda. O‘ng qanot kuchlarining mavqeyi mustahkamlanishi rasmiy Berlinning markaziy boshqaruv mexanizmini qiyinlashtirishi va kelajakda federal darajadagi saylovlarda kutilmagan natijalarga olib kelishi mumkin.
Ayni paytda ushbu voqea nemis matbuoti va siyosiy doiralarida eng ko‘p muhokama qilinayotgan mavzuga aylandi.
