O‘zbekistonda konsertlarga 10,5 million tomoshabin tashrif buyurdi
Milliy statistika qo‘mitasining 2025 yil 1 yanvardagi ma’lumotlariga ko‘ra, O‘zbekistonda jami 98 ta konsert tashkiloti faoliyat yuritmoqda. Bu haqda Zamin.uz xabar berdi.
2024 yil davomida mamlakat bo‘ylab konsertlarga jami 10,5 milliondan ortiq tomoshabin tashrif buyurgan. Eng ko‘p konsert muxlislari Toshkent shahrida qayd etilgan bo‘lib, ularning soni 5 810,6 ming kishini tashkil etadi.
Shuningdek, Samarqand viloyatida 505,2 ming, Qoraqalpog‘iston Respublikasida 461,9 ming, Surxondaryo viloyatida 403,3 ming va Xorazm viloyatida esa 397,1 ming kishi konsertlarda ishtirok etgan. Ushbu raqamlar mamlakatda madaniyat va san’at sohasining rivojlanayotganidan dalolat beradi.
Konsert tashkilotlari va ularning faoliyati aholi madaniyatiga bo‘lgan qiziqishning oshayotganini ko‘rsatmoqda. Bu esa O‘zbekistonda madaniy tadbirlarning jadal rivojlanishi uchun qulay sharoitlar yaratilayotganini tasdiqlaydi.
