Taylor Svift milliardlik biznes tizimini yaratdi
Teylor Svift nafaqat mashhur pop yulduzi, balki o‘z biznesini muvaffaqiyatli rivojlantirgan tadbirkordir. Bu haqda Zamin.uz xabar berdi.
Uning jamoasi kasseta savdosidan tortib, mehmonxona bronlashgacha bo‘lgan keng ko‘lamli iqtisodiy tizimni yaratgan. U bir vaqtning o‘zida shou yulduzi, kino prodyuseri va sport olamida ham tanilgan shaxs hisoblanadi.
2023-yilda u milliarderlar qatoriga kirdi. 2023-yil 3-oktyabrda Svift yangi albomi The Life of a Showgirl va konsert filmini taqdim etdi.
Bloomberg Billionaires Index ma’lumotlariga ko‘ra, uning boyligi oxirgi ikki yilda 1 milliard dollarga oshib, 2,1 milliard dollarga yetgan. Bu o‘sish asosan gastrollar, filmlar va albomlar huquqlarini qayta sotib olish hisobiga amalga oshirilgan.
Svift an’anaviy studiya tizimiga qarshi chiqib, shaxsiy imidj va brend asosida foydali biznes kelishuvlarini amalga oshirdi. Uning “Swiftonomics” deb ataluvchi iqtisodiy strategiyasi san’atkorlar emas, balki prodyuserlar asosiy daromadni oladigan tizimga qarshi yo‘naltirilgan.
Eras Tour gastrollari 51 shahar iqtisodiyotiga katta ta’sir ko‘rsatdi. Shimoliy Amerikada chipta sotuvidan 2,2 milliard dollar daromad olindi.
Muxlislar AQShda taxminan 5 milliard dollar sayohat, mehmonxona, oziq-ovqat va sovg‘alarga sarfladi. Gastrollar shahar markazlarida transport harakati va mehmonxonalar bandligini sezilarli darajada oshirdi.
Taylor Swift: The Eras Tour filmi pandemiyadan keyingi kinoteatr bozori uchun muhim voqea bo‘ldi. AMC kinoteatrlar tarmog‘i bilan to‘g‘ridan-to‘g‘ri hamkorlik Sviftga daromadning katta qismini olish imkonini berdi.
Yangi film Taylor Swift: The Official Release Party of a Showgirl bir haftalik namoyishda bo‘lib, AQShda 30-35 million dollar daromad keltirishi kutilmoqda. Svift 2019-yildan beri yaratgan musiqa asarlarining umumiy qiymati taxminan 400 million dollarni tashkil qiladi.
U ilk albomlari ustidan master yozuvlar huquqini qayta sotib olib, Taylor’s Version nomli qayta yozilgan albomlar ustidan to‘liq nazoratga ega bo‘ldi. Spotify ma’lumotlariga ko‘ra, oxirgi ikki yilda u dunyoda eng ko‘p tinglangan ijrochi bo‘ldi.
Albomlari yuzdan ortiq platina maqomiga erishgan. Striming xizmatlari asosiy daromad manbai hisoblanadi, ammo faqat albom sotish emas, balki merchandizing, kolleksiyaga mo‘ljallangan vinil va kasseta savdosi, konsertlar hamda filmlar orqali ko‘p kanalli biznes modeli tashkil etilgan.
Teylor Svift “Swiftonomics” strategiyasi orqali nafaqat ijodiy muvaffaqiyatga erishdi, balki butun iqtisodiy tizimni yaratib, turli platformalar va biznes yo‘nalishlari orqali milliardlab daromad olish imkoniyatini yaratdi. Uning yondashuvi zamonaviy san’atkorlar uchun namuna bo‘lib xizmat qiladi.
