Aktrisa tug‘ruqxonadagi kamchiliklarni tanqid qildi

Aktrisa Feruza Normatova o‘zining Instagram sahifasida Sergeli 1-tug‘ruq kompleksidagi shifokorlar va nevropatologning faoliyatiga oid jiddiy e’tirozlarini bildirdi. Bu haqda Zamin.uz xabar berdi.

U o‘z murojaatida yaqin tanishining ushbu shifoxonada farzandini dunyoga keltirganini, ammo jarayon davomida bir qator kamchiliklar va muammolar kuzatilganini ta’kidladi. Normatovaning so‘zlariga ko‘ra, uning tanishi tug‘ruq jarayonida qattiq qiynalgan.

Tajribasiz akusherka bolaning boshiga bir necha marta zarar yetkazgan, shundan so‘ng katta tajribaga ega mutaxassis chaqirilgan. Natijada, chaqaloq jarohat olib, reanimatsiyada kislorod apparatiga ulangan.

Onaga esa hech qanday ma’lumot berilmagan. Tug‘ruqxonaga tashrif buyurgan Normatovaga hammasi yaxshi ekani aytilgan bo‘lsa-da, keyinchalik chaqaloqning holati og‘irligi va nevropatolog tomonidan e’tiborsizlik bo‘lganini bilgan.

Aktrisa shifoxona mas’ullariga bir qator savollar bilan murojaat qildi. U nevropatologning chaqaloqning yoniga biror marta ham kirmaganini tanqid qilgan va tug‘ruq kompleksida mavjud holatni tekshirish zarurligini ta’kidlagan.

Shuningdek, u reanimatsiyada yotgan chaqaloqlar holati uchun mas’uliyatni so‘roq ostiga qo‘ygan. Mazkur murojaat ijtimoiy tarmoqlarda keng muhokamalarga sabab bo‘ldi.

Foydalanuvchilar mazkur masalada tegishli idoralar chora ko‘rishi lozimligini ta’kidlashmoqda. Bu holat tibbiyot tizimidagi kamchiliklarga e’tibor qaratish zarurligini yana bir bor ko‘rsatmoqda.