Eron elchixonasi Yulduz Usmonovaga insonparvarlik harakati uchun minnatdorchilik bildirdi
Eron Islom Respublikasining mamlakatimizdagi elchixonasi O‘zbekiston xalq artisti Yulduz Usmonovaga o‘zining samimiy minnatdorchiligini bildirdi. Bu haqda Zamin.uz xabar berdi.
Mazkur e’tirof xonandaning Livan, G‘azo, Falastin va Eron hududlarida istiqomat qilayotgan, bugungi kunda og‘ir sinovlarni boshidan kechirayotgan bolalar taqdiriga befarq bo‘lmagani hamda ularga hamdardlik bildirgani bilan bog‘liqdir. Shu munosabat bilan san’atkorga elchixona nomidan maxsus esdalik sovg‘asi topshirildi.
Ushbu sovg‘ani Eron Islom Respublikasining favqulodda va muxtor elchisi Muhammad Ali Iskandariy hamda elchixonaning madaniy aloqalar bo‘yicha maslahatchisi Hasan Safarxoniy yuborgan. Elchixona vakillari o‘z murojaatlarida xonandaning mazlum bolalar huquqlarini himoya qilib, ularning dardiga sherik bo‘lganini yuksak baholadilar.
Ularning ta’kidlashicha, san’atkorning insonparvarlik tamoyillariga asoslangan fikrlari va ijtimoiy mas’uliyati alohida e’tirofga loyiqdir. Yulduz Usmonova ko‘rsatilgan ushbu e’tibor va ehtirom uchun o‘z minnatdorchiligini bildirdi.
Xonanda o‘z so‘zida har doim mazlumlar va yordamga muhtoj insonlar tarafida ekanini alohida qayd etdi. U barchamiz bir din vakillari ekanimizni eslatib o‘tib, tinchlik va totuvlik insoniyat uchun eng oliy ne’mat ekanini ta’kidladi.
Xonanda janob Muhammad Ali Iskandariy va Hasan Safarxoniyga samimiy tilaklarini yo‘llar ekan, Eron xalqiga tinchlik va omonlik tiladi. Shuningdek, u ikki davlat o‘rtasidagi do‘stona aloqalar va madaniy bordi-keldilar kelgusida yanada kengayishiga umid bildirdi.
San’atkor barcha xalqlarni faqat yaxshi kunlarda va tinchlik davrida ko‘rishish nasib etishini niyat qildi. Ushbu uchrashuv va e’tibor xalqlar o‘rtasidagi ma’naviy ko‘prikni yanada mustahkamlashga xizmat qilishi shubhasizdir.
