Neslihan Atagul Mayamidagi festivalda maxsus mukofot bilan taqdirlandi
Turkiyaning taniqli aktrisasi Neslihan Atagul xalqaro maydondagi yutuqlari qatorini yana bir nufuzli mukofot bilan boyitdi. Bu haqda Zamin.uz xabar berdi.
U Amerika Qo‘shma Shtatlarining Mayami shahrida ilk bor tashkil etilgan turk dramalari festivalida maxsus e’tirof mukofoti bilan taqdirlandi. Mazkur mukofot aktrisaga turk seriallarini dunyo miqyosida ommalashtirish hamda ularning xalqaro muvaffaqiyatiga qo‘shgan salmoqli hissasi uchun topshirildi.
Turk seriallarining Lotin Amerikasidagi o‘n yillik zafarlariga bag‘ishlangan tantanali kechada Neslihan Atagul sahnaga turk dramalari malikasi deya taklif qilindi. Mukofotni qabul qilib olgan aktrisa o‘zining minnatdorlik nutqini ispan tilida so‘zladi.
Uning samimiy chiqishi va ispan tilida ravon muloqot qilgani tadbir ishtirokchilarining qizg‘in olqishlariga sazovor bo‘ldi. Ushbu lahzalar aks etgan videolar qisqa vaqt ichida ijtimoiy tarmoqlarda keng tarqalib, millionlab tomoshabinlar e’tiborini tortdi.
Tantanali marosimda Neslihan Atagulga turmush o‘rtog‘i, taniqli aktyor Kadir Dog‘ulu hamrohlik qildi. Kechada turk kino sanoatining xalqaro yutuqlariga hissa qo‘shgan ko‘plab aktyorlar, rejissyorlar va ijodiy jamoa vakillari bir sahnada jam bo‘lishdi.
Bu kabi tadbirlar turk kinosining jahon miqyosidagi nufuzini yanada oshirishga xizmat qiladi. Eslatib o‘tamiz, Neslihan Atagul va Burak O‘zchivit bosh rollarni ijro etgan Sevgi iztirobi seriali 2017-yilda nufuzli xalqaro Emmi mukofotini qo‘lga kiritgan ilk turk seriali sifatida tarixga kirgan edi.
Mazkur loyiha turk seriallarining jahon bozoridagi muvaffaqiyatida muhim burilish yasagan asarlardan biri hisoblanadi. Bugungi kunda ham turk kino ijodkorlari tomonidan yaratilayotgan asarlar dunyoning turli chekkalarida katta qiziqish bilan tomosha qilinmoqda.
Aktrisaning navbatdagi mukofoti esa uning nafaqat o‘z vatanida, balki xalqaro miqyosda ham yuksak darajadagi ijodkor ekanligini yana bir bor isbotladi.
