Ziroat Mirziyoyeva Belgradning tarixiy va madaniy maskanlari bilan tanishdi
O'zbekiston Respublikasi Prezidenti Shavkat Mirziyoyevning Serbiyaga amalga oshirgan rasmiy tashrifi doirasida mamlakatimizning Birinchi xonimi Ziroat Mirziyoyeva Belgrad shahrida Serbiya Birinchi xonimi Tamara Vuchich hamrohligida bir qator tarixiy va madaniy maskanlar bilan tanishdi. Bu haqda One.uz xabar beradi.
Tashrif dasturidan Serbiyaning boy milliy merosi va ma'naviy qadriyatlarini aks ettiruvchi Milliy muzey hamda muhtasham Avliyo Savva ibodatxonasi joy oldi. Ushbu uchrashuvlar ikki davlat o'rtasidagi madaniy-gumanitar aloqalarni mustahkamlash, xalqlar o'rtasidagi o'zaro hurmat va do'stlik rishtalarini yanada kengaytirishga xizmat qiladi.
Serbiya Milliy muzeyiga tashrif Ziroat Mirziyoyeva va Tamara Vuchich o'z muloqotlarini Serbiya Milliy muzeyidan boshladilar. Mazkur dargoh mamlakatning eng qadimiy va boy xazinalaridan biri sanaladi.
Oliy martabali mehmonlar muzey fondidan joy olgan noyob arxeologik topilmalar, serb xalqining shakllanish tarixi bilan bog'liq eksponatlar hamda jahon tasviriy san'atining durdona asarlarini ko'zdan kechirdilar. Shuningdek, Birinchi xonimlar "Etno-mreja" deb nomlangan an'anaviy hunarmandchilik ko'rgazmasini ham tomosha qildilar.
Ushbu ekspozitsiya serb xalqining qadimiy amaliy san'ati, to'qimachilik va milliy liboslar tayyorlash an'analarini o'zida mujassam etgani bilan mehmonlarda katta qiziqish uyg'otdi. Muzeydagi eksponatlar orasida XII asrga oid "Miroslav Injili" qo'lyozmasi alohida e'tirof etildi.
Serb kirill yozuvining eng qadimiy yodgorligi hisoblangan ushbu asar o'zining nafis miniatyuralari va yuksak badiiy bezaklari bilan ajralib turadi. Ta'kidlash joizki, ushbu qo'lyozma 2005-yilda YUNESKOning "Jahon xotirasi" xalqaro reyestriga kiritilgan bo'lib, u nafaqat Serbiya, balki butun insoniyatning bebaho madaniy merosi hisoblanadi.
Ma'naviy va madaniy hamkorlik muloqoti Madaniy dasturning navbatdagi manzili dunyodagi eng yirik pravoslav ibodatxonalaridan biri bo'lgan Avliyo Savva cherkovi bo'ldi. Belgradning ramziy inshootlaridan biri sanalgan ushbu cherkov o'zining mahobatli me'moriy yechimi va ichki qismining betakror bezaklari bilan hayratlanarli ko'rinishga ega.
Ziroat Mirziyoyeva va Tamara Vuchich ibodatxonaning qurilish tarixi hamda uning serb xalqi ma'naviy hayotidagi o'rni bilan yaqindan tanishdilar. Tashrif davomida bo'lib o'tgan samimiy suhbatlarda ikki mamlakat o'rtasidagi gumanitar hamkorlikni yangi bosqichga olib chiqish masalalari muhokama qilindi.
Tomonlar madaniyat, san'at va tarixiy merosni asrab-avaylash borasida tajriba almashish har ikki xalq uchun ham manfaatli ekanini ta'kidladilar. Bunday yuqori darajadagi madaniy muloqotlar O'zbekiston va Serbiya o'rtasidagi munosabatlarni yanada yaqinlashtirishda muhim poydevor bo'lib xizmat qiladi.
