O'zbekiston hunarmandlari Nyu-Dehlidagi xalqaro ko'rgazmada o'z mahsulotlarini namoyish etmoqda
Hindiston poytaxti Nyu-Dehli shahridagi Milliy hunarmandchilik muzeyida BRIKS sammiti doirasida tashkil etilgan Xalqaro madaniyatlar va hunarmandchilik ko‘rgazmasi o‘z ishini boshladi. Bu haqda One.uz xabar beradi.
Ushbu nufuzli tadbirda O‘zbekiston o‘zining boy madaniy merosi, milliy matolari va qadimiy kulollik maktabi namunalari bilan munosib ishtirok etmoqda. Ko‘rgazmaning markaziy qismida ona tilimizdagi Xush kelibsiz yozuvining paydo bo‘lishi va o‘zbek ustalari tomonidan taqdim etilgan san’at asarlari xalqaro hamjamiyat e’tiborini o‘ziga qaratmoqda.
Tadbir o‘tkazilayotgan hududning kirish qismida turli tillarda yozilgan qutlov so‘zlari orasida o‘zbek tilidagi yozuvning mavjudligi milliy madaniyatimizning jahon maydonidagi o‘rni va nufuzidan dalolat beradi. Mazkur ko‘rgazma nafaqat iqtisodiy va siyosiy aloqalarni, balki xalqlar o‘rtasidagi madaniy rishtalarni mustahkamlashga xizmat qilmoqda.
Pavilonlar bo‘ylab sayr qilar ekansiz, uzoq Hindiston zaminida o‘zbekona ruhni his etish har bir vatandoshimiz qalbida faxr tuyg‘usini uyg‘otishi shubhasiz. Dehli markazida o‘zbek ipaklari va Qo‘qon kulolligi Ko‘rgazma maydonida yuqoriga osilgan turli milliy matolar orasida o‘zbek xonatlasi va yorqin rangli atlas-adras polotnolari alohida ajralib turibdi.
O‘zbekiston uchun ajratilgan maxsus stendda yurtimizning mohir hunarmandlari o‘z mahoratlarini namoyish etmoqdalar. Xususan, Qo‘qon kulollik maktabi vakili Akbar Tursunaliyev hamda rangtasvir va naqshkorlik ustasi Ulug‘bek Sharoboyevlar tomonidan tayyorlangan buyumlar ko‘rgazma mehmonlarida katta qiziqish uyg‘otmoqda.
Milliy stendimizda namoyish etilayotgan laganlar, choynak va piyolalar, shuningdek, noyob naqshli ko‘zachalar o‘zbek xalq amaliy san’atining yuksak namunasidir. Ayniqsa, BRIKS sammitiga bag‘ishlab maxsus tayyorlangan va Qo‘qon kulollik an’analarini aks ettiruvchi zarhal laganlar xorijlik diplomatlar va sayyohlar tomonidan yuksak e’tirof etilmoqda.
Ustalarimizning ta’kidlashicha, hindistonliklar va boshqa xalqaro delegatsiya vakillari o‘zbek naqshlarining nozikligi va ranglar mutanosibligiga yuqori baho bermoqda. Olis yurtda samimiy uchrashuv Vatandan minglab chaqirim olisda o‘zbek san’atini dunyoga tanitayotgan ijodkorlar bilan uchrashish jurnalistlar guruhi uchun ham unutilmas voqea bo‘ldi.
Suhbat davomida hunarmandlarimiz o‘zbek madaniyatiga bo‘lgan qiziqish har qachongidan yuqori ekanini bildirishdi. Uchrashuv yakunida Qo‘qon kulollik maktabi ustasi tomonidan taqdim etilgan qadimiy islimiy naqshlar bilan bezatilgan ko‘zacha o‘zbek milliy merosining ramziy tuhfasi sifatida qabul qilindi.
Ushbu xalqaro anjuman doirasidagi ishtirok O‘zbekistonning boy madaniy salohiyatini yana bir bor namoyon etdi. Dehli markazida jaranglagan o‘zbek so‘zi va namoyish etilgan san’at namunalari xalqlar o‘rtasidagi do‘stlik ko‘prigini yanada mustahkamlashga xizmat qiladi.
Biz ushbu nufuzli tadbirlar jarayonini kuzatishda davom etamiz.
