O‘zbekistonliklar BAAga sayohatni 28 foiz oshirdi
Milliy statistika qo‘mitasi ma’lumotlariga ko‘ra, 2025 yilning yanvar-may oylarida 71 400 nafar o‘zbekistonlik Birlashgan Arab Amirliklariga turistik maqsadlarda safar qilgan. Bu haqida Zamin.uz xabar berdi.
Ushbu ko‘rsatkich o‘tgan yilning mos davriga nisbatan 15 700 nafarga yoki 28,2 foizga oshgan. Joriy yilning dastlabki besh oyida BAAga borgan o‘zbekistonliklarning asosiy safar maqsadlari turizm, qarindoshlarni ko‘rish, xizmat, davolanish va ta’lim bo‘ldi.
Sayohatchilar soni 63 042 nafarni tashkil etgan bo‘lsa, qarindoshlarini ziyorat qilish maqsadida 7 397 nafar odam safar qilgan. Shuningdek, xizmat bilan bog‘liq safarlar soni 571 nafarni tashkil etdi.
Davolanish va ta’lim maqsadida esa mos ravishda 225 va 117 nafar o‘zbekistonlik BAAga borgan. Turizm sohasidagi ushbu o‘sish ikki mamlakat o‘rtasidagi savdo, xizmatlar va madaniy aloqalarni yanada mustahkamlashga xizmat qiladi.
Bu esa yangi imkoniyatlar yaratib, ikki davlat o‘rtasidagi turizm hamkorligini rivojlantirishga yordam beradi. Natijada, turizm bozori kengayib, iqtisodiy foyda manbaiga aylanadi.
Bu jarayon mamlakatlar o‘rtasidagi do‘stona aloqalarni mustahkamlashda muhim ahamiyatga ega.
