O‘zbekiston diplomatlari Mersinda mehnat sharoatini o‘rgandi
O‘zbekiston elchixonasi vakillari Turkiyaning Mersin viloyatiga amaliy safar uyushtirdi. Bu haqida Zamin.uz xabar berdi.
Ushbu safarning asosiy maqsadi Mersin viloyatida vaqtincha ishlayotgan O‘zbekiston fuqarolarining yashash va mehnat sharoitlari bilan yaqindan tanishish, shuningdek, salohiyatli ish beruvchilar bilan muzokaralar olib borishdan iborat bo‘ldi. Safar davomida O‘zbekiston fuqarolari bilan bo‘lib o‘tgan muloqotda mamlakatimizda tashqi mehnat migratsiyasini tartibga solish, xavfsiz va tartibli mehnat migratsiyasini tashkil etish, xorijda ishlayotgan yurtdoshlar hamda ularning oila a’zolarini qo‘llab-quvvatlash borasida amalga oshirilayotgan ishlar haqida ma’lumot berildi.
Mehnat migrantlariga Turkiya mehnat va migratsiya qonunlariga qat’iy rioya qilish zarurligi ta’kidlandi. Shuningdek, O‘zbekiston diplomatlari IC İchtash Nükleer korxonasi vakili Go‘kxan Kartaymaz bilan uchrashuv o‘tkazdi.
Muloqot chog‘ida O‘zbekiston fuqarolarini tashkilotchilik asosida ishga joylashtirish hajmini oshirish, uyushgan holda ishga qabul qilish tizimining afzalliklari, Turkiyada ishlash istagida bo‘lgan fuqarolarimizni O‘zbekistonda malaka sertifikatlari bilan ta’minlash masalalari muhokama qilindi. Ma’lum qilinishicha, hozirgi kunda mazkur kompaniyada 700 nafardan ortiq O‘zbekiston fuqarolari mehnat bilan ta’minlangan.
Muzokaralar yakunida kelajakda ushbu kompaniya bilan O‘zbekiston fuqarolarini tashkilotchilik asosida ishga joylashtirish bo‘yicha hamkorlikni yo‘lga qo‘yishga kelishib olindi.
