Andijon shahrida joylashgan “SMT” MCHJga qarashli “MTTY” do‘konida Turkiyada ishlab chiqarilgan yangi tug‘ilgan chaqaloqlar kiyimlari nazorat xaridi asosida tekshirildi. Bu haqida Zamin.uz xabar berdi.
Tanlangan mahsulot akkreditatsiyadan o‘tgan sinov laboratoriyasida tahlil qilindi va texnik reglament talablariga zid bir qator kamchiliklar aniqlangan. Asosiy mato tarkibi 100 foiz paxta bo‘lishiga qaramay, dekorativ mato 100 foiz poliefirdan iboratligi ma’lum bo‘ldi.
Bundan tashqari, buyumning old tomonida biriktiruvchi tikishlar bajarilmagani aniqlangan. Sintetik dekorativ elementlar esa chaqaloqning bo‘yin va qo‘l terisiga to‘g‘ridan-to‘g‘ri tegib turadi.
Shuningdek, erkin formaldegid miqdori me’yordan oshib, 20 mikrogramm o‘rniga 22,6 mikrogramm aniqlangan. Mutasaddilar ta’kidlaganidek, bunday mahsulotlardan foydalanish bolalarda allergiya va teri yallig‘lanishiga olib kelishi mumkin.
Hozirda mazkur nomuvofiq kiyimlarni sotuvga chiqarilgan “SMT” MCHJga nisbatan tegishli chora-tadbirlar ko‘rilmoqda. Savdo nuqtalaridan mahsulotlarni olib tashlash yuzasidan murojaatlar yo‘llanib, masala qat’iy nazoratga olingan (zamin.uz).
