Davlat xavfsizlik xizmati va Chegara qo‘shinlari tomonidan taqdim etilgan ma’lumotlarga ko‘ra, Qirg‘iziston fuqarolari ishtirokidagi fojiali voqea yuzasidan o‘zbekistonlik chegarachilarning harakatlari qonuniy va asosli deb topildi. Bu haqida Zamin.uz xabar berdi.
15-avgust kuni Toshkent viloyati Bo‘stonliq tumanidagi Ugam-Chotqol qo‘riqxonasi yaqinida chegara hududida ikki noma’lum shaxs harakat qilgani aniqlangan. Chegara xizmatchilari ularga to‘xtash haqida ogohlantirish bergan, ammo shaxslar buyruqqa bo‘ysunmay qochishga harakat qilgan.
Qoidalarga muvofiq, chegarachilar avval osmonga qarata ogohlantiruvchi o‘q uzgan, ammo bu ta’sir qilmagach, davlat chegarasini buzayotgan shaxslarga qarshi qurol ishlatishga majbur bo‘lgan. Natijada ikki shaxs og‘ir yaralangan va voqea joyida halok bo‘lgan.
Ko‘rikda chodir, uch bosh ot, oziq-ovqat mahsulotlari va uchinchi shaxsning izlari aniqlangan. Hodisa haqida darhol Qirg‘iziston va Qozog‘iston chegara xizmatlari xabardor qilingan.
31-avgust kuni halok bo‘lgan shaxslarning Qirg‘iziston fuqarolari ekanligi tasdiqlanib, ularning jasadlari qarindoshlariga topshirilgan. 2-3 sentyabr kunlari ikki mamlakat chegara idoralari rahbarlari tomonidan hodisa joyi ikki tomonlama o‘rganilgan.
O‘rganish natijasida chegara naryadining harakatlari O‘zbekiston qonunchiligiga mosligi va halok bo‘lgan shaxslar davlat chegarasini buzgani rasmiy tasdiqlandi. Shuningdek, uchinchi shaxsning Qirg‘iziston hududiga qaytib yashirinishga ulgurgani aniqlangan.
Shu bilan birga, qochgan shaxsni aniqlash va tegishli chora ko‘rish bo‘yicha ikki tomonlama hamkorlik kelishib olindi. Rasmiy bayonotda ta’kidlanishicha, noxush holatlarning oldini olish maqsadida chegara hududlarida istiqomat qiluvchi aholi bilan tushuntirish ishlari olib boriladi, tog‘li hududlarda qo‘riqlash va hamkorlik kuchaytiriladi.
Ushbu voqea ikki davlat chegaradagi hamkorlikni mustahkamlash va kelgusida shunday fojialarning oldini olish zarurligini yana bir bor ko‘rsatdi (manba: zamin.uz).
