Nogironlik guruhlari uchun yagona elektron tizim joriy etiladi
Yurtimizda nogironlikni belgilash tizimida muhim o‘zgarishlar amalga oshirilmoqda. Bu haqda Zamin.uz xabar berdi.
Ilgari bu jarayonda yagona standartlarning yo‘qligi, raqamlashtirish tizimining mavjud emasligi va inson omilining ustunligi sababli nogironlik guruhlarini aniqlashda turli xatoliklarga yo‘l qo‘yilardi. Shuningdek, bir xil kasallikka chalingan bemorlarga turlicha nogironlik guruhlari berilishi holatlari ham uchrab turardi.
Ushbu muammolarni bartaraf etish maqsadida davlat tomonidan “Yagona milliy ijtimoiy himoya” axborot tizimi joriy qilinmoqda. Bu tizim orqali bemorning tibbiy ma’lumotlari asosida nogironlik guruhi, uning muddati, parvarish yordami, reabilitatsiya vositasi yoki protez-moslamaga ehtiyoji avtomatik tarzda, inson omilisiz aniqlanadi.
Yangi elektron tizim dastlab 2025 yil 1 oktyabrgacha Toshkent shahri va Navoiy viloyatida sinov tariqasida ishga tushiriladi. Keyinchalik esa butun respublika bo‘ylab keng joriy etilishi rejalashtirilgan.
Bundan tashqari, nogironlikni belgilashda asosiy kasalliklar ro‘yxati tasdiqlanib, faqat ushbu ro‘yxatdagi kasalliklarga ko‘ra yagona va standart mezonlar asosida guruhlar belgilanadi. Bu yangi tizim nogironlikni aniqlash jarayonini aniq va adolatli qilishga xizmat qiladi (manba: zamin.uz).
