O‘zbekiston Prezidenti Shavkat Mirziyoyev mamlakatimiz birinchi mudofaa vaziri, general-polkovnik Rustam Ahmedovning vafoti munosabati bilan chuqur hamdardlik bildirdi. Bu haqda Zamin.uz xabar berdi.
Rustam Ahmedov 82 yoshida hayotdan ko‘z yumdi. U butun umrini harbiy xizmatga bag‘ishlagan, Vatan mudofaasi yo‘lida fidokorona mehnat qilgan salohiyatli sarkarda sifatida keng tanilgan.
Rustam Ahmedov harbiy faoliyatini tank vzvodi komandiri sifatida boshlagan. Keyinchalik u turli rahbarlik lavozimlarida faoliyat yuritib, jumladan, tank diviziyasi siyosiy ishlar bo‘yicha o‘rinbosari, kursantlar bataloni komandiri, shuningdek Toshkent, Samarqand va boshqa oliy harbiy bilim yurtlarida rahbarlik qilgan.
O‘zbekiston mustaqillikka erishgach, u mamlakatimizda ilk mudofaa vaziri bo‘lib tayinlandi va milliy armiyani shakllantirishda muhim rol o‘ynadi. Shuningdek, Rustam Ahmedov Mudofaa vazirligi bosh shtabining qayta tashkil etilishi, harbiy okruglar tizimini yo‘lga qo‘yish hamda qurolli kuchlar boshqaruv tizimini takomillashtirishda katta hissa qo‘shdi.
1997-1998-yillarda u Favqulodda vaziyatlar vaziri lavozimida samarali faoliyat olib bordi. Nafaqaga chiqqanidan keyin ham harbiy sohaning rivojiga xizmat qilib, Mudofaa vazirining maslahatchisi sifatida islohotlarda faol ishtirok etdi.
Prezident matbuot xizmati ma’lumotlariga ko‘ra, Rustam Ahmedov sobit e’tiqodli, kamtarin va fidoyi inson sifatida doimo hurmatga sazovor bo‘lgan. Uning ismi va xotirasi xalqimiz qalbida mangu saqlanadi.
U davlat tomonidan “Shon-sharaf” II darajasi va “Do‘stlik” ordenlari bilan taqdirlangan. Manba: zamin.uz
