O‘zbekistonda ish haqi 19 foizga oshdi
O‘zbekistonda ish haqi darajasi sezilarli darajada oshmoqda. Bu haqda Zamin.uz xabar berdi.
Milliy statistika qo‘mitasining ma’lumotlariga ko‘ra, 2025-yilning yanvar-sentyabr oylarida mamlakat bo‘ylab o‘rtacha nominal ish haqi 6 million 166,9 ming so‘mni tashkil etdi. Bu ko‘rsatkich o‘tgan yilning shu davriga nisbatan 19,2 foizga yuqori hisoblanadi.
Hududlar kesimida eng yuqori ish haqi an’anaviy ravishda Toshkent shahrida qayd etilgan bo‘lib, poytaxtda ishlovchi xodimlar o‘rtacha 10 million 379,6 ming so‘m maosh olgan. Bu ko‘rsatkich 2024-yilga nisbatan 18,7 foizga oshgan.
Ish haqi o‘sish sur’ati bo‘yicha ayrim viloyatlar yetakchilik qilmoqda. Masalan, Samarqand viloyatida o‘rtacha ish haqi 4,8 million so‘mga yetib, o‘sish 124,8 foizni tashkil etdi.
Namangan, Sirdaryo, Farg‘ona va Jizzax viloyatlarida ham ish haqi 119 foizdan yuqori darajada o‘sdi. Eng past o‘sish ko‘rsatgichlari Andijon, Navoiy, Qashqadaryo, Toshkent viloyati, Xorazm, Qoraqalpog‘iston va Buxoro viloyatlarida qayd etildi.
Iqtisodiy faoliyat turlari bo‘yicha tahlillarga ko‘ra, eng yuqori ish haqi bank, sug‘urta, lizing va kredit sohalarida bo‘lib, o‘rtacha 16 million 828,9 ming so‘mni tashkil etadi. Bu ko‘rsatkich o‘tgan yilga nisbatan 15,6 foizga oshgan.
Axborot va aloqa sohasida o‘rtacha ish haqi 14 million 985,8 ming so‘mga yetib, 16,6 foizga o‘sdi. Tashish va saqlash sohasida ish haqi 9 million 382,1 ming so‘m (o‘sish 16,7%), sanoat sohasida esa 7 million 301,0 ming so‘m (o‘sish 16,3%) bo‘ldi.
Qurilish sohasida o‘rtacha ish haqi 6 million 342,6 ming so‘mni tashkil etib, 9,2 foizga ko‘tarildi. Savdo sohasida bu ko‘rsatkich 6 million 875,6 ming so‘m (o‘sish 12,1%), sog‘liqni saqlash va ijtimoiy xizmatlar sohasida esa 3 million 765,4 ming so‘m (o‘sish 14,6%) bo‘ldi.
So‘nggi besh yil ichida O‘zbekistonda maoshlar barqaror o‘sib bormoqda. Ayniqsa, bank, sug‘urta va lizing sohalarida ish haqi keskin oshib, 2021-yilga nisbatan 9 million 92 ming so‘mga ko‘paydi.
Axborot va aloqa sohasida ham ish haqi 9,7 million so‘mga o‘sdi. Tashish va saqlash sohasida bu ko‘rsatkich 5,5 million so‘mga, sanoatda 3,4 million so‘mga, qurilishda esa 2,7 million so‘mga oshdi.
Mutaxassislar ta’kidlashicha, ish haqi o‘sishi mamlakat iqtisodiyotidagi faol investitsiyalar, yangi ish o‘rinlari yaratilishi va mehnat bozoridagi raqobatning kuchayishi bilan izohlanadi. Shuningdek, iqtisodiy islohotlar natijasida turli sohalardagi ish haqi farqlari asta-sekin kamayib bormoqda.
Ma’lumotlar manbai: milliy statistika qo‘mitasi (one.uz).
