5 maydan O‘zbekistonda Kasb va Mehnat kuni nishonlanadi
O‘zbekistonda 5 may kuni endi “Kasb va mehnat kuni” sifatida nishonlanadi. Bu haqda Zamin.uz xabar berdi.
Bu haqda davlat rahbarining “Kasbiy ta’lim tizimida islohotlarni amalga oshirish chora-tadbirlari to‘g‘risida”gi qarorida ma’lum qilingan. Qarorga ko‘ra, yangi bayram doirasida yoshlar orasida kasblarning nufuzini oshirish, mehnatga rag‘batlantirish hamda kasbiy ta’limni keng targ‘ib qilish bo‘yicha turli tadbirlar tashkil etiladi.
Qarorda kasbiy ta’lim tizimini 2030 yilgacha rivojlantirish uchun muhim maqsadlar belgilangan. Xususan, xalqaro va qo‘shma ta’lim dasturlariga ega texnikumlar soni 250 taga yetkaziladi.
Shuningdek, 9-sinf bitiruvchilarining kasbiy ta’lim bilan qamrovi hozirgi 29 foizdan 50 foizgacha oshiriladi. Pedagoglar uchun ham katta imkoniyatlar yaratilib, ularning xorijda malaka oshirish va stajirovka dasturlarida ishtirok etish soni 100 nafardan 2500 nafargacha ko‘paytiriladi.
Bundan tashqari, maktablarning 10-sinf o‘quvchilariga o‘z o‘qishini texnikumlarga ko‘chirish imkoniyati beriladi. Bu yoshlar uchun amaliy kasb egallashni erta boshlash imkonini yaratadi.
2026 yildan boshlab “Kasb va mehnat kuni” har yili keng nishonlanadi. Mutaxassislar fikricha, mazkur tashabbus yoshlar orasida kasb tanlashga bo‘lgan qiziqishni oshiradi va mehnatga munosabatni yangi darajaga olib chiqadi.
Manba: zamin.uz.
