O‘zbekistonda piyodalarning erkin harakatlanishi va xavfsiz dam olishi uchun maxsus avtomobilsiz hududlar tashkil etilmoqda. Bu haqda Zamin.uz xabar berdi.
Bu tashabbus Turizm qo‘mitasi tomonidan ilgari surilgan bo‘lib, uning asosiy maqsadi mahalliy aholi va sayyohlar uchun qulay sharoit yaratishdir. Mazkur hududlar Buxoro, Andijon, Farg‘ona, Qo‘qon, Marg‘ilon, Samarqand kabi shaharlardagi tarixiy va turistik joylarda joriy etilgan.
Masalan, Samarqanddagi Registon maydoni, Shohi Zinda yo‘lagi, Konigil turizm qishlog‘i va boshqa diqqatga sazovor maskanlar avtomobilsiz zonaga aylantirildi. Shuningdek, Qoraqalpog‘iston, Jizzax, Namangan, Qashqadaryo, Sirdaryo, Toshkent shahri va viloyatlari, Navoiy, Surxondaryo hamda Xorazmda ham maxsus piyodalar uchun mo‘ljallangan ko‘chalar va sayr yo‘laklari tashkil etilgan.
Ushbu hududlarda avtomobillar harakatlanishini taqiqlovchi belgilar o‘rnatilgan. Bu kabi chora-tadbirlar fuqarolar va mehmonlar uchun yanada xavfsiz va shinam muhit yaratishga xizmat qiladi.
