Kasb-hunar ta’limi uchun yangi baholash qoidalari tasdiqlandi
O‘zbekiston Adliya vazirligi kasb-hunar ta’limi tashkilotlari uchun ta’lim dasturlarini baholashga doir yangi qoidalarni tasdiqladi. Bu haqda Zamin.uz xabar berdi.
Ushbu hujjat 2025-yil 1-dekabrdan kuchga kirdi. Mazkur tartibga ko‘ra, jami 163 ta ko‘rsatkich belgilangan bo‘lib, ular 31 ta mezon asosida oltita yo‘nalishga ajratilgan.
Ko‘rsatkichlar majburiy va umumiy turlarga bo‘linadi. Majburiy ko‘rsatkichlar qatoriga mas’ul bo‘limning aniq ish rejasi va o‘quv xonalarining yetarli darajada ta’minlanganligi kiradi.
Umumiy ko‘rsatkichlar esa zamonaviy o‘quv adabiyotlaridan foydalanish, talabalar o‘rtasida so‘rovlar o‘tkazish va sport infratuzilmasi mavjudligini qamrab oladi. Baholash jarayonida har bir ko‘rsatkich "mos keladi" yoki "mos kelmaydi" tamoyili asosida baholanadi.
Agar mezonning yarmidan kamrog‘i bajarilgan bo‘lsa, “mos kelmaydi” deb hisoblanadi. Yarmidan 60 foizgacha bajarilsa, “qisman mos keladi”, 60 foizdan yuqori natija ko‘rsatilsa, “mos keladi” deb baholanadi.
Muhim jihat shundaki, agar birorta majburiy ko‘rsatkich “mos kelmaydi” deb topilsa, boshqa ko‘rsatkichlarning natijalaridan qat’i nazar, mezon umumiy hisobda “mos kelmaydi” deb baholanadi. Mazkur yangi mezonlar ta’lim sifatini oshirishga qaratilgan bo‘lib, kasb-hunar ta’limi tizimida yanada samarali boshqaruvni ta’minlashga xizmat qiladi.
