O‘zbekiston va Rossiya yangi loyihalarni muhokama qildi
Prezident Shavkat Mirziyoyev 3-dekabr kuni Toshkentda bo‘lib o‘tgan O‘zbekiston va Rossiya hukumatlararo komissiyasi yig‘ilishi doirasida Rossiya hukumati raisining birinchi o‘rinbosari Denis Manturov boshchiligidagi delegatsiyani qabul qildi. Bu haqda Zamin.uz xabar berdi.
Uchrashuv davomida Rossiyaning yetakchi kompaniyalari O‘zbekistonda axborot texnologiyalari, energetika va sanoatning turli tarmoqlarida amalga oshiriladigan yangi loyihalarni taqdim etdi. Delegatsiya tarkibida Rossiyaning Nijniy Novgorod va Omsk viloyatlari, Boshqirdiston hamda Krasnoyarsk o‘lkasi rahbarlari ham ishtirok etdi.
Denis Manturov suhbat boshida Prezident Shavkat Mirziyoyevga Rossiya Prezidenti Vladimir Putinning samimiy salomi va ezgu tilaklarini yetkazdi. Tomonlar oliy darajadagi uchrashuvlar natijasida qabul qilingan “yo‘l xaritasi” ijrosi bo‘yicha fikr almashdi.
Xususan, savdo hajmining izchil o‘sib borayotgani, sanoat, energetika, transport, metallurgiya, kimyo va boshqa sohalarda qo‘shma loyihalarning muvaffaqiyatli amalga oshirilayotgani mamnuniyat bilan qayd etildi. Shuningdek, tovar ayirboshlash sur’atini saqlab qolish, sanoat zonalari doirasida kooperatsiya loyihalarini jadallashtirish va hududlararo aloqalarni mustahkamlash masalalari muhokama qilindi.
Uchrashuv davomida Rossiyaning yirik kompaniyalari rahbarlari O‘zbekistonda rejalashtirilayotgan loyihalar haqida batafsil ma’lumot berdi. Bu loyihalar axborot texnologiyalari, elektrotexnika, mashinasozlik, farmatsevtika, to‘qimachilik va oziq-ovqat sanoati kabi sohalarni qamrab oladi.
Hukumatlararo komissiya yig‘ilishi va ishbilarmonlik tadbirlari natijalari ikki davlat o‘rtasidagi iqtisodiy hamkorlikni yangi bosqichga olib chiqishga xizmat qilishi alohida ta’kidlandi.
